საუდის არაბეთი ვიზიტორებისთვის ქვეყნის კარებს პირველად ხსნის და ტურისტული ვიზების გაცემას იწყებს. 49 ქვეყნის მოქალაქეებისთვის ტურისტული ვიზების გაცემას საუდის არაბეთი 27 სექტემბრიდან დაიწყებს.

ტურიზმის მინისტრმა, აჰმად ალ-ჰაბიტმა თქვა, რომ ეს ქვეყნისთვის ისტორიული მომენტია. აქამდე ვიზებს მხოლოდ მომლოცველებისთვის, ბიზნეს საქმიანობისთვის და უცხოელი მომუშავეებისთვის გასცემდნენ.

"ვიზიტორები გაოცდებიან იმ განძით, რომელიც ჩვენ მათ უნდა გავუზიაროთ — იუნესკოს მსოფლიო ფონდის ხუთი ობიექტი, ადგილობრივი კულტურა და სულისშემკვრელი ბუნება", — აცხადებს მინისტრი.

საუდის არაბეთში მოგზაურობისას უცხოელი ქალები ვალდებული არ იქნებიან, რომ ქუჩაში სეირნობისას სხეული მთლიანად დაფარონ, თუმცა მოკრძალებულად მაინც უნდა ჩაიცვან. გარდა ამისა, არ იქნება შეზღუდვა თუ ქალებს თანხმლები პირი არ ეყოლებათ.

არამუსლიმებს ისლამური სამყაროს ორ უმნიშვნელოვანეს ქალაქში, მექასა და მედინაში შესვლა კვლავ ეკრძალებათ. გარდა ამისა, შეზღუდვა ალკოჰოლის მოხმარებაზეც ვრცელდება.

საუდის არაბეთმა ტურიზმის განვითარების მასშტაბურ პროექტზე 2017 წელს ისაუბრა. წინა წელს ერ-რიადთან ახლოს ე.წ. გასართობი ქალაქის მშენებლობა დაიწყო, რომელიც თემატურ პარკებსა და ავტოსპორტის ობიექტებს გააერთიანებს.