ოკუპირებული ცხინვალის KGB საქართველოს სახელმწიფო უსაფრთხოების სამსახურის "სავსებით საიდუმლო დოკუმენტს" აქვეყნებს. სახელმწიფო უსაფრთხოების სამსახურში On.ge-ს უთხრეს, რომ დოკუმენტი ყალბია. მათივე თქმით, ის ოკუპირებული ცხინვალის რეგიონში მცხოვრებ მოსახლეობაში დეზინფორმაციის გავრცელებას ისახავს მიზნად.

როგორც დე ფაქტო სამხრეთ ოსეთის რესპუბლიკაში ამბობენ, აღნიშნული ე.წ. დოკუმენტი ფრაქცია ქართული ოცნება — დემოკრატიული საქართველოს 2016-2020 წლის სამოქმედო გეგმას ეხება. საოკუპაციო რეჟიმი ამ ე.წ. დოკუმენტს იმის დასამტკიცებლად აქვეყნებს, რომ საქართველო სამხრეთ ოსეთზე კონტროლის დამყარებაზე უარს არ ამბობს.

დოკუმენტის ტექსტში საუბარია ტერიტორიული მთლიანობის აღდგენასა და ეკონომიკური მიმართულების გეგმებზე. ე.წ. დოკუმენტი 2015 წლის 24 მაისით თარიღდება და მას თითქოსდა სუს-ის ხელმძღვანელი, ვახტანგ გომელაური და ქართული ოცნების თავმჯდომარე, ბიძინა ივანიშვილი აწერენ ხელს. გომელაური "დეპარტამენტის უფროსად", ხოლო ივანიშვილი "ფრაქციის ხელმძღვანელად" არის მოხსენიებული.