განახლება: საქართველოს პარლამენტის თავმჯდომარემ არჩილ თალაკვაძემ ევროპული საქართველოს დეპუტატებს პლენარულ სხდომათა დარბაზი დაატოვებინა

საქართველოს პარლამენტმა მუშაობა ხმაურის, დაპირისპირებისა და აქციების ფონზე განაახლა. პლენარულ სხდომათა დარბაზში ევროპული საქართველოს დეპუტატმა ელენე ხოშტარიამ საქართველოს პრემიერ-მინისტრის კანდიდატად გიორგი გახარიას წარდგენა და ქართული ოცნების მმართველობა უწყვეტი სტვენით გააპროტესტა. მას აცვია თეთრი მაისური წარწერით #სირცხვილია.

პარლამენტის შესასვლელთან პოლიციის წინააღმდეგობის მიუხედავად #სირცხვილიას რამდენიმე აქტივისტმა სხდომათა დარბაზში შესვლა მაინც შეძლო, მათაც პროტესტი სასტვენებით გამოხატეს. მათი ნაწილი პარლამენტთან რჩება და სკანდირებს #სირცხვილია.

საქართველოს პარლამენტის თავმჯდომარემ, არჩილ თალაკვაძემ მანდატურის სამსახურს წესრიგის დამყარებისკენ მოუწოდა.

"აი, ასე გადაწყვიტეს ჩვენმა კოლეგებმა, რომ დღეს ქვეყანაში არსებული დემოკრატია და დემოკრატიის საკითხი გამოხატონ, გთხოვთ საზოგადოებას თვალი მიადევნოთ", — განაცხადა არჩილ თალაკვაძემ.

საქართველოს პარლამენტთან მოძრაობა #სირცხვილიას ორგანიზატორებმა დეპუტატებისთვის ე.წ. სირცხვილს კორიდორების მოწყობა გუშინ, 2 სექტემბერს დააანონსეს. დილიდან #სირცხვილიას მხარდამჭერები და ორგანიზატორები შეიკრიბნენ, როგორც ქართული ოცნების ოფისთან, ისე პარლამენტთან. მათ ოცნების მმართველობა და პრემიერის კანდიდატურად შს მინისტრის გიორგი გახარიას წარდგენა გააპროტესტეს. სწორედ, #სირცხვილია ითხოვს უკვე 76-ე დღეა გახარიას გადადგომას საქართველოს პარლამენტთან 20-21 ივნისის აქციის დაშლის გამო.

საქართველოს პარლამენტის 2019 წლის საშემოდგომო სესია პლენარული სხდომით ოფიციალურად გაიხსნა. სესიის ფარგლებში პარლამენტარებს არაერთი მნიშვნელოვანი და სადავო საკითხი აქვთ განსახილველი. მათ მიმდინარე კვირაში მთავრობის ახალ შემადგენლობასა და სამთავრობო პროგრამას უნდა მოუსმინონ და კენჭი უყარონ.