გასული საუკუნის 30-იანი წლებიდან მოყოლებული, ფერისცვალობის დღესასწაულზე ბახმარო საოცარი სანახაობის მასპინძელი ხდება: აქ საქართველოს ყველა რეგიონიდან ჩამოდიან ცხენოსნები ტრადიციულ დოღსა და მარულაში მონაწილეობის მისაღებად.

დოღი მდინარე ბახვისწყლის კალაპოტში ღია სივრცეში იმართება. წელიწადის ამ დროს მდინარე საგრძნობლად იკლებს და მისი გადაკვეთა ადვილია. რბოლის ტრასა ორივე ნაპირს გასწვრივ მიუყვება და ორ ადგილას კვეთს მდინარეს, ბოლოს კი ბაზრის ტერიტორიაზე სრულდება, სადაც დოღის სანახავად მოსულ სტუმრებს ადგილობრივი ნაწარმის დათვალიერებისა და შეძენის საშუალება აქვთ.

დოღი ადგილობრივი თვითმმართველობის ორგანიზებით ტარდება და საკურორტო სეზონის მთავარ მოვლენას წარმოადგენს.

რა თქმა უნდა, არც წლევანდელი ზახფული ყოფილა გამონაკლისი. წყაროს წყალი ბახმაროსა და ნაბეღლავის მწარმოებელი კომპანიის წყალი მარგებლის ორგანიზებით, 19 აგვისტოს ბახმაროს თასი 2019 გაიმართა, რომლის საპრიზო ფონდიც 15 000 ლარი იყო.

ღონისძიების გენერალური მხარდამჭერია საქართველოს ბანკი, ღონისძიების პარტნიორები კი - კომპანია გალფი, გლოვო და კროკო-ბეთი.

ფოტო: წყალი მარგებელია

სულ ოთხი გარბენი შესრულდა:

ადგილობრივი ჯიშის ცხენების გარბენში, რომელიც 2400 მეტრს და 2 წრეს მოიცავდა, სოფელ სურების წარმომადგენელმა სოსო რამიშვილმა გაიმარჯვა და 1000 ლარი დაიმსახურა.

მეორე გარბენი შერეული სისხლის ჯიშის ცხენებს დაეთმო (2400 მეტრი) და გათამაშდა გმირების თასი, რომელშიც პირველობა ოზურგეთელმა გივი გიორგაძემ არავის დაუთმო და 1000 ლარიც დაიმსახურა.

მესამე გარბენში ზუგდიდის საცხენოსნო კლუბ რებას ცხენოსანმა საბა ეხვაიამ "ბახმაროს თასი 2019-ში" გრან-პრი მიიღო. კლუბის ცხენმა "ლიმონამ" 4-800 მეტრიანი გარბენში გაიმარჯვა. მხედარი 2 500 ლარით დაჯილდოვდა.

2 400-მეტრიან გარბენში კლუბის კიდევ ერთმა ცხენმა "ბლექ დაიმონდმა" პირველი ადგილი მოიპოვა. მხედარი ამ შემთხვევაშიც საბა ეხვაია იყო. დოღის ყველაზე უხუცეს მონაწილეს, 79 წლის ზაურ ტატიკოვს 1000 ლარი გადაეცა.

ფოტო: წყალი მარგებელია

კომპანია გალფმა ოთხივე გამარჯვებულს პერსონალური კომპიუტერები გადასცა.

ბახმარო

ბახმარო მესხეთის ქედზე, მდინარე ბახვისწყლის ხეობაში, ტყის ზონის ზემო ნაწილში, ზღვის დონიდან 2050 მეტრზე მდებარეობს. ბახმაროს ტერიტორია ერთგვარ ქვაბულს წარმოადგენს, რომელიც გარშემორტყმულია ნაძვისა და სოჭის მარადმწვანე ტყით.

ნისლიანი მწვერვალებისა და ულამაზესი ალპური ზონის გამო ბახმაროს ყოველ ზაფხულს უამრავი ადამიანი სტუმრობს.