Marvel-ის კინოსამყაროში ადამიანი ობობას და სუპერგმირზე გადაღებულ ფილმებს ვეღარ ვიხილავთ. წარმატებული პარტნიორობის დასრულება Sony-სა და Disney-ის შორის არსებულ შეუთანხმებლობას მოჰყვა.

მარველისა და სონის პარტნიორობაზე კონკრეტული დეტალები უცნობია, თუმცა თანამშრომლობისას ამ უკანასკნელს ადამიანი ობობას ფილმებზე საავტორო უფლებები და ბოქს ოფისიდან შემოსავალის დიდი ნაწილი რჩებოდა.

დისნეიმ სონის სთხოვა, რომ ადამიანი ობობას მომავალი ფილმებიდან შემოსავალი სტუდიებს შორის 50/50-ით გაყოფილიყო. შეთავაზებაზე სონიმ უარი თქვა, რის შემდეგაც დისნეიმ შეთანხმება დაასრულა.

სონი ფიქჩერსის ტვიტერზე გამოქვეყნებული განცხადებით, კინოსტუდია დამდგარ შედეგზე იმედგაცრუებას გამოხატავს. მასში აღნიშნულია, რომ მარველის პრეზიდენტი, კევინ ფეიჯი ადამიანი ობობას მომავალი ფილმების მთავარი პროდიუსერი არ იქნება.

"იმედს ვიტოვებთ, რომ მოცემულობა მომავალში შეიცვლება, თუმცა იმ ახალი პასუხისმგებლობების გამო, რაც მას დისნეიმ დააკისრა, გვესმის, რომ ის იმ პროექტებზე აღარ იმუშავებს, რომელსაც მარველი არ ფლობს. კევინი საოცარია და მისი გაკვალული ბილიკისთვის, რომელსაც ჩვენ გავაგრძელებთ, მადლიერები ვართ", — წერია ტვიტების სერიაში.

ადამიანი ობობას ფრენჩაიზიდან ბოლო ფილმი, Spider-Man: Far From Home, სონისთვის ყველაზე წარმატებული აღმოჩნდა.