ქართული ოცნების დეპუტატი, ნინო წილოსანი ფეისბუქის გვერდზე წერს, რომ მოსახლეობასთან ჩატარებული ექვსი შეხვედრიდან ექვსივეზე სთხოვეს, გადაეცა გიორგი გახარიასთვის, "არ წავიდესო". დეპუტატი ამით ბახმაროში გიორგი გახარიას გადადგომის მოთხოვნით გამართულ აქციას გამოეხმაურა.

მისი თქმით, გურიაში "დიდი სიყვარულით" შეხვდა ხალხი ხელისუფლების წევრებს, ოპოზიციის წარმომადგენლები კი "მინელებულ რეჟიმში" იყვნენ.

ფეისბუქმომხმარებლებმა ნინო წილოსანის ფეისბუქსტატუსს Haha ემოციები დაუწერეს. ამ დროის [14:11] მონაცემებით, დეპუტატის სტატუსს 396 Haha ემოცია და 31 მოწონება აქვს.

შინაგან საქმეთა მინისტრის, გიორგი გახარიას გადადგომას 20 ივნისს მიმდინარე აქციის ძალის გამოყენებით დაშლის გამო ითხოვენ. აქციაზე საქართველოში რუსი დეპუტატის, სერგეი გავრილოვის ვიზიტსა და პარლამენტის თავმჯდომარის სკამიდან რუსულ ენაზე განცხადების გაჟღერებას აპროტესტებდნენ. 20 ივნისის ღამეს შსს-ს სპეციალურმა რაზმმა აქცია ძალის გამოყენებით რეზინის ტყვიებით, ცრემლსადენი გაზითა და წყლის ჭავლით დაშალა. მათი პოზიციით, იგეგმებოდა საქართველოს პარლამენტზე, როგორც ინსტიტუტზე შტურმი და დამხობა.