რუსეთში მოღვაწე ჟურნალისტი თინა კანდელაკი მეორე ადამიანია, ვინც ამერიკელ პოპვარსკვლავ კეტი პერის სექსუალურ შევიწროებაში ადანაშაულებს.

ინფორმაციას მუსიკალური გამოცემა NME რუსულ გაზეთზე, Rossiyskaya Gazeta დაყრდნობით ავრცელებს. კანდელაკი წერს, რომ ის და პერი ერთად იყვნენ წვეულებაზე, სადაც მომღერალი არაფხიზელ მდგომარეობაში მას ეხებოდა და კოცნას ცდილობდა.

კანდელაკი ტელეგრამზე წერს, რომ კეტი პერის "თავიდან მოშორება" შეძლო:

"ვარჯიშმა და ფიზიკურმა ძალამ შედეგი გამოიღო და მას შევებრძოლე, რის შემდეგაც კეტიმ მაშინვე გადაინაცვლა ახალი მსხვერპლისკენ (საუბედუროდ, ისევ ქალისკენ), კოცნით, შეხებითა და ბინძური ცეკვებით. შემიძლია ვთქვა, რომ წვეულებაზე არავინ დაშავებულა, თუმცა არ გამიკვირდება მისი გაუბედურებული თაყვანისმცემლებისგან, რომლებიც ყველაფერს წლების განმავლობაში ჩუმად ინახავდნენ, მსგავსი მოგონებების ახლა გახსენება".

კანდელაკმა სტატუსი Teenage Dreams-ში მონაწილე მსახიობი და მოდელის ჯოშ კლოსის საპასუხოდ დაწერა, რომელმაც ასევე დაადანაშაულა პერი სექსუალურ შევიწროებაში:

"მან ადიდასის შარვალი და ტრუსი ჩამხადა, რომ მისი გეი მეგობრებისთვის და გარშემო მყოფებისთვის ჩემი პენისი ეჩვენებინა. წარმოგიდგენიათ როგორ შერცხვენილად და საცოდავად ვიგრძენი თავი?"

კანდელაკი კიდევ ერთ პოსტში საუბრობს სექსუალური შევიწროების პრობლემაზე და ამბობს, რომ ამ თემით ქალები ხშირად სპეკულირებენ. 13 აგვისტოს გამოქვეყნებულ სტატუსში მას მაგალითად პლასიდო დომინგოს წინააღმდეგ არსებული ბრალდებები მოჰყავს და წერს, რომ ამ გზით ცნობილ ადამიანებს რეპუტაციას ულახავენ. სექსისტურ პოსტში ის დომინგოს და სხვებს (კევინ სპეისი, კრიშტიანუ რონალდუ) ამართლებს და ოპერის მომღერალს ეთანხმება, რომ 80-იან წლებში ურთიერთობებსა და ორმხრივ თანხმობაზე განსხვავებული სტანდარტები არსებობდა. ამ პოსტიდან გამომდინარე, კითხვის ნიშნის ქვეშ დგება მისივე ბრალდების სერიოზულობა პერის მიმართ.

კეტი პერისა და მის წარმომადგენლებს ბრალდებებისთვის არ უპასუხიათ. მომღერალმა 9 აგვისტოს ახალი სიმღერა გამოუშვა, სახელად Small Talk.