თბილისსა და რუსთავში ფილმ ფორსაჟის კადრების გადაღების მიზნით რამდენიმე ქუჩა გადაიკეტება. ამის შესახებ On.ge-სთვის გახდა ცნობილი. ჯერჯერობით უცნობია, კონკრეტულად სად გადაიღებენ ფილმის კადრებს. ინფორმაცია რამდენიმე დღეში ოფიციალურად გახდება ცნობილი. გადაღებები დედაქალაქში სავარაუდოდ 18-20 აგვისტოს დაიწყება და 5 კვირის განმავლობაში გაგრძელდება.

პროგრამის გადაიღე საქართველოში ფარგლებში ჰოლივუდის ფილმს ფორსაჟი 9-ს 10-წუთიან მონაკვეთს საქართველოში გადაიღებენ. ფილმის საქართველოში გადაღება ჰოლივუდის მაღალი რანგის წარმომადგენლების ვიზიტის დროს გადაწყდა.

საქართველოში ჰოლივუდური ფილმის გადაღებისთვის მაქსიმუმ 31,4 მილიონი ლარი (31 358 162 ლარი) უნდა დაიხარჯოს. ამის შესახებ მთავრობის განკარგულებაში წერია, რომელსაც ხელს პრემიერ-მინისტრი მამუკა ბახტაძე აწერს. განკარგულება 10 ივლისით თარიღდება. პროფესიული საჰაერო ფოტო და ვიდეო გადაღების წარმოების მიზნით, უცხოურმა ოპერატორმა, XM2 UK LIMITED-მა სამოქალაქო ავიაციის სააგენტოს მიერ დადგენილი წესების შესაბამისად, უპილოტო საჰაერო ხომალდების სავალდებულო რეგისტრაციის პროცესი გაიარა და გადაღებებისთვის საქართველოში 8 უპილოტო საჰაერო ხომალდიც დარეგისტრირდა.