გერმანიაში, მემინგენის ციხიდან გაქცეული ქართველი პატიმარი დააკავეს. 37 წლის ვ.ჯ პოლიციამ ამჯერად ბავარიაში დააპატიმრა.

გერმანული მედიის ინფორმაციით, მემინგემის ციხიდან ორი პატიმარი კვირას, 4 აგვისტოს გაიქცა. პატიმრებმა ციხის ეზოში სეირნობის დროს კედელზე გადაძრომა მოახერხეს და მიიმალნენ. ქართველ პატიმარს ბრალი ყაჩაღობის მუხლით ჰქონდა წარდგენილი. გერმანული პოლიციის თქმით, დაკავებისას ქართველი პატიმარი მარტო იმყოფებოდა. პოლიციამ მოგვიანებით მეორე გაქცეულის კვალსაც მიაგნო.

გერმანული მედიის ცნობით, გერმანიაში ციხიდან გაქცევის გამო პატიმრებს ცალკე სასჯელი არ ემუქრებათ.