ევოლუშენ გეიმინგის თანამშრომლების საპროტესტო აქციის ერთ-ერთი მონაწილე შეუძლოდ გახდა. მას დახმარება სასწრაფო-სამედიცინო დახმარებამ აღმოუჩინა.

ევოლუშენ გეიმინგის თანამშრომლები მეხუთე დღეა გაფიცულები არიან. ისინი ხელფასების მატებას, სამსახურიდან გათავისუფლებული ათამდე თანამშრომლის აღდგენას და იმის გარანტიას ითხოვენ, რომ გაფიცულების წინააღმდეგ დისციპლინარული ღონისძიები არ განხორციელდება.

პროტესტს სოლიდარობას უცხადებს პროფკავშირების გაერთიანება. მათი ინფორმაციით, გაფიცულია 400-მდე თანამშრომელი.

პირველი არხის ინფორმაციით, კომპანიის იურისტმა განაცხადა, რომ მზად არიან კონსტრუქციული დიალოგისთვის. მანვე უარყო ინფორმაცია იმის შესახებ, რომ კომპანია გაფიცულ თანამშრომლებს ათავისუფლებს.

ევოლუშენ გეიმინგი ონლაინ კაზინოების შვედური კომპანიაა, რომელიც საქართველოს ბაზარზე 2017 წლიდან ოპერირებს. კომპანია 12 ქვეყანაში აწვდის ცოცხალი კანიზოს სერვისს პარტნიორ კომპანიებს. B2B კლიენტებს Live გადაწყვეტილებებსა და სხვადასხვა პროდუქტებს სთავაზობს.