კასპის მერი მანუჩარ მერებაშვილი ამბობს, რომ ამავე მუნიციპალიტეტის სოფელ კავთისხევში, ჩოჩეთის უბანში, სასმელი წყლის პრობლემა წვიმის შემდეგ მოგვარდება. ამის შესახებ ადგილობრივი გამოცემა qartli.ge წერს. ამავე გამოცემასთან ინტერვიუში კასპის მერი ამბობს, რომ წყლის სიმცირე გვალვას უკავშირდება.

"19 აგვისტოს ფერისცვალების დღესასწაულია, სწორედ ამ პერიოდიდან იწყებს ტემპერატურა დაწევას, ნალექი მოვა, მიწაში წყალი მოიმატებს და მოსახლობას სასმელი წყლის პრობლემები მოეხსნება", — თქვა მანუჩარ მერებაშვილმა qartli.ge-სთან.

გამოცემის ცნობით, კასპის მუნიციპალიტეტის სოფელ კავთისხევში, ქვემო ჩოჩეთის უბანში, სასმელი წყალი ორ დღეში ერთხელ მიეწოდებათ, ერთი ან ორი საათის განმავლობაში.

კასპის მერის ინფრასტრუქტურის სამსახურის უფროსი, აჩიკო გიგოლაშვილი აცხადებს, რომ პრობლემა თავად კავთისხეველებმა უნდა მოაგვარონ.

"ზოგ ოჯახში ამ წყლით ნაკვეთებს რწყავენ. ეს თვითონ სოფლელებმა უნდა დაარეგულირონ", — აცხადებს აჩიკო გიგოლაშვილი qartli.ge-სთან.