ჰარი პოტერი და საიდუმლო ოთახის მომაჯადოებელი ილუსტრაციები

ალოჰომორა, ლუმოს, აკციო პოტერჰედებო! თქვენი ყურადღების მისაპყრობად მალე შელოცვების მარაგი ამოგვეწურება. კიდევ ერთი სიახლე გვაქვს, დღეს ლონდონში ჰარი პოტერი და საიდუმლო ოთახის ილუსტრირებული ვერსია გამოვიდა.

ხომ ვამბობდით მუდმივი მხოლოდ ენერგიაა ჩაკეტილ სისტემაში და როულინგის შემოქმედებაო. ხოდა არ ვცდებოდით. ჯადოსნური სამყაროს დედოფალმა შეძლო და შვილისთვის ხელსახოცზე დაწერილი ზღაპარი იმდენად პოპულარული გახადა, რომ ამდენი წლის შემდეგაც კი არ წყდება აჟიოტაჟი ჰარი პოტერის ირგვლივ.

აშენდა ჰოგვარტსის სკოლის პროტოტიპი, გაიხსნა სასტუმრო, სოფელი ჰოგსმიდიც კი შეგიძლიათ იხილოთ, ჰარი პოტერის ფესტივალი შეიქმნა, კინგ ქროსის სადგურზე მემორიალური ძეგლი დაიდგა, დისნეილენდის კონკურენციაც კი დაიგეგმა და ჰარი პოტერის გასართობი ცენტრი გაიხსნა, წიგნის გაგრძელება დაიწერა, პრიქველებიც კი შემოგვაპარეს და მაინც, პოტერჰედების გაუმაძღარი მადა მუდმივად მოითხოვს სიახლეს. ამჯერად მათი გულის გასახარად უკვე მეორე წიგნის ილუსტრირებული ვერსია გამოვიდა.

ილუსტრაციები ჯიმ კეის შემოქმედებით, გამაოგნებლად რეალურია, იმდენად რამდენადაც ჯადოსნური სამყაროს ილუსტრაცია შეიძლება რეალური იყოს.

გავიხსენოთ, რომ ამ ნაწილის ერთ-ერთი მთავარი პერსონაჟი ყველასთვის საყვარელი, გმირად შერაცხული შინაური ელფი დობია. ავტორს მისი დაღვრემილი და კეთილი თვალები იმდენად დამაჯერებლად გამოუვიდა გეგონება ფილმის პერსონაჟი გადმოხატაო.

ჯიმ კეიმ მთელი თავისი დიდებულებით, მედიდურობით და მაგიურობით წარმოგვიჩინა ჰოგვორსტი. ისე, რომ წარსულის სიმძიმეც იგრძნოთ.

მზად ხართ? არაგოგის შემზარავად დიდი სხეული ჯიმ კეის აზრით ასე გამოიყურება.

ჩვენი ნახევრადგოლიათი ჰაგრიდი ტრადიციულად გაბურძგნილი წვერით და გაჩეჩილი თმით შემოგვთავაზა. ალბათ, ფილმის გამოსვლამდე თქვენც ასე წარმოიდგენდით რუბიუსს.

ჯიმ კეის კიდევ ერთი მნიშვნელოვანი არსება არ გამორჩენია, ან იქნება მცენარეც, რას გაიგებ. ხომ გახსოვთ მანდრაგორებმა ამ ნაწილში რამდენად მნიშვნელოვანი როლი შეასრულეს? ასე გამოიყურებიან ისინი ილუსტრირებულ წიგნში.

აქ ცოტა პრეტენზიულობის უფლება მივცეთ თავს და ვაღიაროთ, რომ ჰარი პოტერის ერთადერთი ილუსტრაცია, რომელსაც შევეგუებით მხოლოდ დენიელ რედკლიფის გამოსახულება იქნება ან არა.

აქვე შეგვიძლია გავიხსენოთ პირველი წიგნის, ჰარი პოტერი და ფილოსოფიური ქვის ილუსტრაციები, რომლებიც შარშან ზუსტად 4 ოქტომბერს წარადგინეს.

აქ შეგიძლიათ იხილოთ სირიუსის მოტოციკლით მფრინავი ჰაგრიდი, მრუდე ქუჩა, ოლივანდერის მაღაზია, ჰარი, მალფოი, ჰერმიონი და ფენიქსიც კი.

აი ასეთი ფერადი, მიმზიდველი და მომაჯადოებელი წიგნის ყიდვა შეუძლია ახალ თაობას. აბა ჩვენ დროს ყველაფერი წარმოსახვის უნარზე და ახალი ფილმის გამოსვლაზე იყო დამოკიდებული.

ბოლო ამბები:

გირჩევთ

ჰარი პოტერი და საიდუმლო ოთახის მომაჯადოებელი ილუსტრაციები

კომენტარები

კვირის ტოპ-5

გირჩევთ

ახლა კითხულობენ

მთიელი წიგნების იმერული ესკიზები