რუსი დეპუტატის სერგეი გავრილოვის საქართველოს პარლამენტში "მასპინძლობის" შემდეგ მართლმადიდებლობის ასამბლეის ქართველმა ორგანიზატორმა, ზაქარია ქუცნაშვილმა მანდატის დატოვების შესახებ განაცხადა. ამის შემდეგ ის პარლამენტში აღარ გამოჩენილა. შედეგად, ქუცნაშვილმა 20 ივნისის შემდეგ საგაზაფხულო სესიის დახურვამდე ჩანიშნული 4 პლენარული სხდომა არასაპატიო მიზეზით გააცდინა და ხელფასიდან 925 ლარი ჩამოაჭრეს.

საპროცედურო საკითხთა კომიტეტმა ზაქარია ქუცნაშვილის მანდატის შეჩერების საკითხი მისივე მოთხოვნის საფუძველზე 19 ივლისს განიხილა და დააკმაყოფილა.

საქართველოს პარლამენტის ახალი რეგლამენტის ამოქმედების შემდეგ არასაპატიო გაცდენების გამო სულ 29 დეპუტატი დააჯარიმეს. მათ ხუთ თვეში როგორც საკომიტეტო, ისე პლენარული სხდომების გაცდენების გამო, ჯამში, 52 975 ლარი ჩამოეჭრათ. საბოლოოდ, იმ დეპუტატების ხუთეული, რომელსაც გაცდენების გამო ხელფასიდან ყველაზე მეტი თანხა ჩამოაჭრეს, ასე გამოიყურება:

  • კახაბერ ოქრიაშვილი, ქართული ოცნება — 7 111 ლარი;
  • რუსლან გაჯიევი, ქართული ოცნება — 6 936 ლარი;
  • დიმიტრი სამხარაძე, ქართული ოცნება — 5 654 ლარი;
  • ივლიანე წულაია, ქართული ოცნება — 4 624 ლარი;
  • ირაკლი ხახუბია, ქართული ოცნება —2 370 ლარი.

საგაზაფხულო სესიის პლენარული სხდომა თებერვალში გაიხსნა და ივნისის ბოლო პარასკევს დაიხურა. დეპუტატის მინიმალური ხელფასი 4 623 ლარია.