ხორვატიის ზღვისპირეთი Game of Thrones ეკრანებზე გამოჩენამდეც საკმაოდ პოპულარული ადგილი იყო ვიზიტისთვის, თუმცა HBO-ს ეპიკურმა სერიალმა ამ ადგილით დაინტერესებას საკმაოდ დიდი ბიძგი მისცა. დღეს თითქმის შეუძლებელია, ხორვატიაში იყოს ტურისტი, რომელსაც არ აინტერესებს თუ სად იღებდნენ ცნობილ სერიალს. შეგახსენებთ, რომ მეფის სავანის ძალიან ბევრი სცენა ქალაქ დუბროვნიკშია გადაღებული, თუმცა დუბროვნიკის გარდა ხორვატიაში კიდევ არის ადგილები, სადაც თავს სერიალის გმირად იგრძნობთ.

ლოვრიჯენაკის ციხესიმაგრე, დუბროვნიკი

სერიალის ფანებისთვის ეს ადგილი ერთგვარი მექაა, რომელიც ყველაზე შესამჩნევია დუბროვნიკის გადასაღები ლოკაციებიდან და ინსტაგრამზეც ყველაზე ხშირად ხვდება. ციხესიმაგრე კრისტალურად სუფთა ადრიატიკის ზღვაში დგას და სერიალში სწორედ ამ ადგილას არის აღმართული ცნობილი Red Keep ანუ ციხესიმაგრე, რომელშიც მეფე/დედოფალი ცხოვრობს. იქვეა გადაღებული მეორე სეზონის პირველი სერია, სადაც მეფე ჯოფრის სახელობის დღე აღინიშნება და ტურნირია გამართული.

ტრსტენოს დენდროპარკი, ტრესტენო

მეფის სავანის ბაღის სცენების უმეტესობა ტრსტენოს ზღვისპირა დენდროპარკშია გადაღებული. ბოტანიკურ ბაღებში ულამაზესი ყვავილებისა და სიმწვანის გარდა შეგიძლიათ რენესანსის პერიოდის ბაღის არქიტექტურა ნახოთ, რომელიც ვიზუალურ ისტორიას წარმოადგენს და საშუალებას მოგცემთ 16 საუკუნის ხორვატიაში იმოგზაუროთ. ეს დენდროპარკი ადრე გუჩენიჩების ცნობილ ოჯახს ეკუთვნოდა და კონტინენტზე ერთ-ერთი უძველესია.

წმინდა დომინიკას და სტრადუნის ქუჩები, დუბროვნიკი

დუბროვნიკის ქუჩებს, ქვის პატარა სახლებს და არქიტექტურას სერიალის მერვე სეზონის წყალობით ალბათ ყველაზე მარტივად იცნობთ, რადგან ძნელია დაივიწყო ის ყველაფერი რაც მეხუთე ეპიზოდში მოხდა. თუ ზარების ხმას გაიგებთ პანიკაში ნუ ჩავარდებით, გახსოვდეთ, რომ საფრთხე არ გემუქრებათ.

დიოკლეტიანეს სასახლე, სპლიტი

დიოკლეტიანეს ლაბირინთიანი სასახლე ქალაქ სპლიტის რომაული არქიტექტურის ცენტრია. სწორედ ამ ლაბირინთებში ჰყავდა და წვრთნიდა დენერისი საკუთარ დრაკონებს. სწორედ ამ გვირაბებშია გადაღებული მეოთხე სეზონის სცენები, სადაც მონები საკუთარ ბატონებს უჯანყდებიან და ციხეს იღებენ.

ლოკრუმის კუნძული

დაუსახლებელი კუნძული ლოკრუმი დუბროვნიკთან ძალიან ახლოსაა. აქ სიმწვანე და ისტორიული ნანგრევები ერთმანეთს ერწყმის. კუნძული ტყით არის დაფარული, სანაპიროები კი ქვიანია. ცენტრში დანგრეული ციხე სიმაგრე და ბოტანიკური ბაღებია, რომელიც თავის დროზე მაქსიმილიან პირველმა ააშენა და მისი საზაფხულო სახლი იყო. ის ავსტრიელი იმპერატორის ფრანც იოსებ პირველის უმცროსი ძმა იყო. სწორედ აქ არის გადაღებული სერიალის ქალაქ ქარტის უძველესი პორტი, რომელსაც მეორე სეზონში ვხედავთ.

თუ ხორვატიაში მოგზაურობას და ამ ადგილების მონახულებას გადაწყვეტთ, არ დაგავიწყდეთ შეიძინოთ იმედი L-ის სამოგზაურო დაზღვევა ონლაინ.