ქართველი სტუდენტი, გიორგი ხიმშიაშვილი ამბობს, რომ გერმანიის ქალაქ მიუნხენში ქართულ დიასპორასთან შეხვედრისას პრეზიდენტ სალომე ზურაბიშვილი აგრესიული გახდა და მათი შეურაცხყოფა დაიწყო. როგორც რუსთავი 2-ს უყვება, პრეზიდენტს მათ მიერ დასმული კრიტიკული შეკითხვები არ მოეწონა. პრეზიდენტის ადმინისტრაციაში გავრცელებული ინფორმაცია უარყვეს.

ხიმშიაშვილი ტელეკომპანიასთან ყვება, რომ თავიდან ყველაფერი მშვიდად მიდიოდა, სანამ კითხვები სპორტსა და განათლებას ეხებოდა, თუმცა შემდეგ ვითარება დაიძაბა. სტუდენტის თქმით, ისინი საქართველოს პოლიტიკურ და სოციალურ მოვლენებს შეეხნენ, რამაც ზურაბიშვილის ხისტი რეაქცია გამოიწვია.

"ჩემს მეგობრებს მიმართ, რომ ისინი ნაციონალური მოძრაობიდან იყვნენ და ა.შ. რაღაც უაზრო განცხადებებს აკეთებდა, უწიგნურები გვიწოდა და კომიკური ვითარება შეიქმნა. თვით პრეზიდენტსაც კი არ აცდიდნენ ლაპარაკს, რომ გაეცა ჩვენთვის პასუხი. თქვენ მყისიერი რეაქცია მოახდინეთ გაბუნიას განცხადებაზე, სადაც მან შეურაცხყოფა მიაყენა რუსეთის პრეზიდენტს. ყოველივე ზემოთ აღნიშნულიდან გამომდინარე, იბადება ლეგიტიმური კითხვა, ხომ არ არის საქართველოს დღევანდელი პრეზიდენტი ნებსით, თუ უნებლიეთ რუსეთის იმპერიალისტური პოლიტიკის მხარდამჭერი და განმახორციელებელი საქართველოში.

ეს კითხვა დავუსვი, მან მიპასუხა, რომ ის არის, ანუ ირონიულად, ანუ დაგვცინა, მე პირადად დამცინა ამ კითხვის გამო და მითხრა, რომ ის იყო გამავრცელებელი რუსეთის პოლიტიკის, დამეთანხმა, მაგრამ ირონიულად. გახდა ძალიან აგრესიული და გადავიდა შეურაცხყოფაზე. ამან ჩვენ შოკში ჩაგვაგდო, იმიტომ, რომ პრეზიდენტისგან ასეთი დამოკიდებულება სტუდენტების მიმართ ძალიან შემაშფოთებელია", — ამბობს გიორგი ხიმშიაშვილი.

გარდა ამისა შეხვედრის დაწყებისას თეოლოგმა მირიან გამრეკელაშვილმა და გიორგი ხიმშიაშვილმა 20 ივნისის აქციის დაშლა სიმბოლურად გააპროტესტეს. მათ მარჯვენა თვალზე ხელი აიფარეს. ამ სიმბოლური ჟესტის პარალელურად, ფოტოზე ჩანს, საქართველოს პრეზიდენტი სალომე ზურაბიშვილი.