ერთიანი ნაციონალური მოძრაობის განცხადებით, შეკვეთილში ივანიშვილის რეზიდენციასთან მოშიმშილეებს კარავი დაუნგრიეს. ადგილიდან აქციის მონაწილე, მინდია ადაძე ვიდეოს ავრცელებს.

მისი თქმით, კარავში მყოფ ერთ პირს ხელიც დაარტყეს. ამავე ვიდეოში აქციის მონაწილეები ამბობენ, რომ მათ ქართული ოცნების წევრები დაუპირისპირდნენ.

შინაგან საქმეთა სამინისტროს ცნობით, აქციის მონაწილეებსა და ადგილობრივ მაცხოვრებლებს შორის მოხდა სიტყვიერი და ფიზიკური დაპირისპირება. უწყებაში აცხადებენ, ადგილობრივებმა აქციის მონაწილეებს ტერიტორიის დატოვება მოსთხოვეს.

შსს-ში ასევე ამბობენ, რომ ამჟამად მდგომარეობა კონტროლს ექვემდებარება და საპატრულო პოლიცია ზრუნავს აქციის მონაწილეების უსაფრთხოებაზე.

შეკვეთილში მე-16 დღეა შიმშილობენ. მოშიმშილეები შს მინისტრის, გიორგი გახარიას გადადგომას მოითხოვენ და ასევე აცხადებენ, რომ საქართველოში უნდა დასრულდეს ოლიგარქიული რეჟიმი. აქციის მონაწილეები სოლიდარობას უცხადებენ თბილისში ანტისაოკუპაციო გამოსვლებს და აპროტესტებენ 20 ივნისს საპროტესტო აქციის დარბევას.