ქართული ოცნების აღმასრულებელი მდივანი, ირაკლი კობახიძე კვირის პალიტრასთან საუბარში განმარტავს, რომ ქვეყანაში შესაძლო დესტაბილიზაციის შესახებ ინფორმაციას ქართულ ოცნებას ენმ-ს ოფისებიდან აწვდიან:

"ვიდრე სკანდალური ჩანაწერი გავრცელდებოდა, ჩვენი წყაროებისგან მსგავსი სცენარის შესახებ ინფორმაცია უკვე გვქონდა. ზუსტად ვიცით, რა გეგმები ჰქონდათ წინასაარჩევნოდ და არჩევნების შემდეგაც - სურდათ პროვოკაციების მოწყობა, რითაც პოსტსაარჩევნო პროცესისთვის ფონი შემზადდებოდა, მოვლენების განვითარება ინტენსიური უნდა ყოფილიყო, თუმცა არც ერთი ინციდენტისა და პროვოკაციის საშუალება არ მივეცით. პარალელურად ჩვენს აქტივისტებს ვეუბნებით: შეგაგინებენ, არ უნდა უპასუხო. დაგარტყამენ, ხმა არ გასცე".

ჟურნალისტის შეკითხვას, ჰყავს თუ არა ქართულ ოცნებას ენმ-ში აგენტურა, კობახიძემ უპასუხა, რომ საქმე მხოლოდ იმაშია, რომ ენმ-ში არიან ადამიანები, რომლებიც პარტიის მიერ დაგეგმილ დანაშაულებრივი გეგმების შესრულებაზე წამსვლელები არ არიან. მისი თქმით, ქართულ ოცნებას ინფორმაცია სწორედ ამ ადამიანებისგან მისდის:

"[პროვოკაციების] მთელი ჯაჭვი უნდა ყოფილიყო. გვქონდა ინფორმაცია ე.წ. პარალელური ორგანიზაციების შექმნის შესახებაც. შექმნეს კიდე ასეთი ორგანიზაცია "საქართველოს ერთგულების სახელით, რომელსაც ენმ-ს გეგმები უნდა განეხორციელებინა".