საქართველოს პრეზიდენტმა, სალომე ზურაბიშვილმა პრესკონფერენციაზე ბოლო დრო განვითარებულ მოვლენებს გამოეხმაურა და სხვადასხვა ძალებს მშვიდობისკენ მოუწოდა. ამასთანავე, მან რუსეთის ფედერაციას მიმართა.

"ქვეყნის გარეთ მივმართავ რუსეთის ხელმძღვანელობას არ აჰყვეს ესკალაციას. პარადოქსი იქნება თუ მეზობელი ქვეყანა მისივე დახასიათებით რადიკალი ძალებისგან წამოწყებულ პროვოცირებას უპასუხებს და ამით მათ დესტრუქციულ მიზნებს შეუწყობს ხელს. აქვე ხაზი უნდა გავუსვა იმასაც, რომ ჩვენი მშვიდობიანი პოლიტიკა არის ერთადერთი გზა ქვეყანაში და რეგიონში სტაბილურობის შესანარჩუნებლად".

ამასთანავე სალომე ზურაბიშვილმა, რუსეთში მცხოვრებ საქართველოს მოქალაქეებს მიმართა და უთხრა, რომ ის მათი პრეზიდენტიცაა და მათი კეთილდღეობა მნიშვნელოვანია.

"ვიცი, ხელისუფლება ცდილობს, გააკეთოს ყველაფერის, რისი გაკეთებაც შეიძლება მოცემულ ვითარებაში, რათა გააგრძელოთ მშვიდად და სტაბილურად ცხოვრება", — აღნიშნა ზურაბიშვილმა.

საქართველოს პრეზიდენტმა თავისი გამოსვლა მიმართვით დაიწყო, რომ გვერდზე უნდა გადაიდოს პოლიტიკური გემოვნება და ემოციები და ყველამ ქვეყნის სტაბილურობაზე უნდა იზრუნოს. მისივე თქმით, არ უნდა დაუშვან, პროვოკაციულმა ძალებმა სცადონ საქართველოს დისკრედიტაცია მის ფარგლებს გარეთ და დესტაბილიზაცია ქვეყანაში. ზურაბიშვილმა ყველას დეესკალაციისკენ მოუწოდა.

"მინდა ყველას შიგნით და გარეთ მოგიწოდოთ დეესკალაციისკენ. მივმართავ იმ ძალებს ქვეყანაში, ვინც ნებსით თუ უნებლიეთ ამ ქვეყნის სტაბილურობას ე.ი. მის მთავარ მონაპოვარს, მის მთავარ ღირებულებას რეგიონალურ და საერთაშორისო პარტნიორებისთვის საკუთარი პოლიტიკური მიზნებისთვის საფრთხის ქვეშ აყენებს — პატრიოტიზმი ქვეყნის დისკრედიტიაცასა და დესტაბილიზაციაზე არ გადის. მივმართავ მათ, ვინც უპასუხისმგებლო განცხადებებითა თუ ქმედებით, პატრიოტიზმის დროშის ქვეშ აზარალებს ჩვენს მოქალაქეებს და მათ ეკონომიკურ მდგომარეობას აქ და ქვეყნის ფარგლებს გარეთ. პატრიოტიზმი სწორედ საკუთარ მოქალაქეებზე ზრუნვაა", — აღნიშნა პრეზიდენტმა.

პრეზიდენტის თქმით, პროპორციული სისტემა ყველას უხსნის საკუთარი ამბიციების კარს და საარჩევნო კოდექსი უფრო სამართლიან არჩევნებს ამზადებს:

"მოგიწოდებთ, რომ მშვიდობიანი არჩევნების გზით თქვენი მოთხოვნები ხალხის არჩევანის წინ დააყენოთ და საზოგადოების პასუხის დაელოდოთ".

გარდა ამისა, პრეზიდენტმა აღნიშნა, რომ დიალოგის საპრეზიდენტო პლატფორმა ყველასთვის ღიაა, ვისაც ქვეყნის სტაბილური მომავალი სურს. სიტყვის დასასრულ პრეზიდენტმა საქართველოში ჩამოსულ სტუმრებს მიმართა.

"საქართველო ისტორიულად ტოლერანტობის სიმბოლოა და არ დავუშვებთ, რომ ეს ტრადიცია დაირღვეს. ქვეყნისთვის ყევლაზე დაძაბულ პერიოდშიც კი არ მომხდარა არც ერთი ინციდენტი, რომელიც საფრთხეს შეუქმნიდა საქართველოში მცხოვრებ უცხოელ მოქალაქეებს თუ უცხოელ სტუმრებს. ეს ასე გაგრძელდება", — აღნიშნა პრეზიდენტმა. სალომე ზურაბიშვილმა ჟურნალისტების კითხვებს არ უპასუხა.