პარლამენტის შენობის წინ ჰომოფობიური აქციის სპიკერები და მონაწილეები ვერ თანხმდებიან დაიშალონ თუ არა. რამდენიმე წუთის წინ მათ მამა დავით ისაკაძემ მოუწოდა წასულიყვნენ და თავად გააკონტროლებდა დაიშლებოდა თუ არა აქცია #სირცხვილია.

ამ აზრს პროტესტი მოყვა. აქციის მონაწილეებმა განაცხადეს, რომ არ დაიშლებიან, რადგან პარლამენტის თავმჯდომარე არ მისულა მათთან და მოთხოვნა არ შეუსრულებია.

ამის შემდეგ ქართული მარშის ლიდერმა სანდრო ბრეგაძემ განაცხადა, რომ თუ აქცია #სირცხვილია დაიშლება, თავადაც წავლენ სახლებში. ამ განცხადებას აქციის მონაწილეები ოვაციებით შეხვდნენ.

თუმცა, როცა მომდევნო გამომსვლელმა განაცხადა, რომ საერთოდ არ უნდა დაიშალონ, სანამ ანტიდისკრიმინაციული კანონი არ გაუქმდება, ამასაც აქციის მონაწილეების შეძახილები მოჰყვა.

ამ დრომდე დემონსტრანტებს ვერ გადაუწყვეტიათ რა პირობებით დაიშლებიან და დაიშლებიან თუ არა.

შინაგან საქმეთა სამინისტროს ინფორმაციით, დაშლაზე ორივე მხარესთან აწარმოებენ მოლაპარაკებებს.