გიორგი გაბუნიას მიერ პირდაპირ ეთერში ვლადიმერ პუტინისა და მისი გარდაცვლილი მშობლების გინება პრემიერმა, მამუკა ბახტაძემ ქვეყნის წინააღმდეგ პროვოკაციულ ომად შეაფასა. მისი თქმით, ეს არის ბინძური და ამაზრზენი თამაში მოქალაქეების მშვიდობისა და უსაფრთხოების წინააღმდეგ. ამის შესახებ მამუკა ბახტაძემ ფეისბუქგვერდზე დაპოსტა.

პრემიერმა მომხდარი ავანტიურად შეაფასა და განაცხადა, რომ მოქალაქეები და საქართველოს მეგობრები ამას უნდა გაემიჯნონ. მსგავსი აზრი გამოთქვა პარლამენტის თავმჯდომარემაც.

რუსთავი 2-მა დაუშვებლად მიიჩნია გაბუნიას ქცევა და გაემიჯნა. აქვე არხი აღნიშნავს, რომ პოლიტიკოსების მსავსი შეფასებები სარედაქციო პოლიტიკაში ჩარევაა.

გაბუნიას მიმართვაზე განცხადება გაავრცელა ეთიკის ქარტიამაც. საბჭოს განცხადებით, ეს არაეთიკური განცხადებები აღვივებს ხელისუფლების მისწრაფებებს შეზღუდოს გამოხატვის თავისუფლება.

გაბუნიას გინება ეთერში და არხის პოზიცია

რუსთავი 2-ის გადაცემა P.S.-ის წამყვანმა, გიორგი გაბუნიამ რუსეთის ფედერაციის პრეზიდენტს, ვლადიმერ პუტინს აგინა. რუსულენოვან მიმართვაში მან არაეთიკურად და შეურაცხმყოფლად მოიხსენია პუტინის გარდაცვლილი დედაც. გენერალურმა დირექტორმა, ნიკა გვარამიამ კვირის აქცენტების სპეციალურ ეთერში განაცხადა, რომ მომხდარი კატეორიულად დაუშვებელი და მიუღებელია. არხი კატეგორიულად არ იზიარებს მსავს დამოკიდებულებას.

გვარამიამ განმარტა, რომ არხი კატეგორიულად არ იზიარებს გამოხატვის მსაგვს ფორმას, მიუხედავად იმისა, რომ იზიარებენ გიორგი გაბუნიას აზრს. მისი თქმით, ეს ქცევა არ შეესაბამება არხის სარედაქციო პოლიტიკასა და მაღალ სტანდარტს.

გვარამიას განცხადებით, გამოხატვის მაღალი თავისუფლება, რომელსაც რუსთავი 2 ანიჭებს მასთან დასაქმებულს, მაღალ პასუხისმებლობასაც ითვალისწინებს. მისი თქმით, მომხდარს ტელევიზიის თვითრეგულირება განიხილავს.