კომიტეტის სხდომაზე დაწყებული დაპირისპირება, სადაც ნიკა მელიას დაკავების საკითხს განიხილავენ, დერეფანშიც გრძელდება. ნაციონალური მოძრაობის წევრმა, რომან გოცირიძემ განაცხადა, რომ პროკურატურას ნიკა მელიაზე მტკიცებულებები არ აქვს.

"ექვსი მოწმიდან ექვსივე სუსის პროვოკატორია", — გოცირიძის ამ ფრაზას მმართველი გუნდის დეპუტატის, მამუკა მდინარაძის გაღიზიანება მოყვა. ის ითხოვდა გოცირიძისგან, რომ თავისი სიტყვები დაემტკიცებინა.

20 ივნისის აქციაზე ძალადობრივი ჯგუფის ხელმძღვანელობისა და მასში მონაწილეობის ბრალდებასთან დაკავშირებით გუშინ, 25 ივნისს პროკურატურაში ბრიფინგი გაიმართა. უწყებაში ნაციონალური მოძრაობის ლიდერის, ნიკა მელიას წინააღმდეგ მიმდინარე საქმეზე ისაუბრეს. პროკურორის თქმით, მათ მიმართეს პარლამენტს, რათა მიიღონ ნებართვა დეპუტატის დაკავებაზე. მელიას იმუნიტეტი იცავს და მის დასაკავებლად პარლამენტის თანხმობაა საჭირო.