"გლდანიდან, გარეუბნიდან უკვე დაიძრა ხალხი. რადგან მთავრობა ვერ მიდის ამათ გაყვანაზე, თვითონ ხალხმა ფიზიკურად უნდა გაიყვანოს ეს ხალხი. თუმცა, ჩვენ გვინდა მთავრობას დავუდასტუროთ, რომ თუკი ამ ხალხს, რომელიც არაფერს ეწევა, გარდა პროვოკაციისა, გაიყვანენ, ჩვენ არ ვაპირებთ არავის ჩაქოლვას", — განაცხადა ჰომოფობიური კონტრაქციის მონაწილე გურამ ფალავანდიშვილმა.

მან მოუწოდა კონტრაქციის მონაწილეებს, რომ თუ აქტივისტები ტერიტორიას დატოვებენ, მათ ფიზიკურად არ შეეხებიან. "სხვა შემთხვევაში ჩვენი ღირსების საკითხია", — განაცხადა მან.

ფალავანდიშვილმა ეს განცხადება პოლიციის გარემოცვაში გააკეთა. მუქარის მიუხედავად, ის არ დაუკავებიათ.

მთავრობის კანცელარიასთან, სადაც ლგბტ პირების აქცია და ჰომოფობიური ჯგუფების კონტრაქცია მიმდინარეობს ყვითელი ავტობუსები მიიყვანეს. თბილისი პრაიდის ორგანიზატორი გიორგი თაბაგარი ამბობს, რომ ავტობუსებით გასვლას არ აპირებენ. მისი თქმით, კანცელარიასთან იქამდე დარჩებიან, სანამ ხელისუფლება პოზიციას არ დააფიქსირებს.