ევროპული საქართველოს ლიდერის ელენე ხოშტარიას თქმით, მისთვის გაუგებარია ქართული ოცნების გენერალური მდივნის, კახა კალაძის განცხადება, რომელმაც უბნების დახურვისთანავე მიულოცა ლადო კახაძეს არჩევნებში გამარჯვება.

"უკვე დაიხურა უბნები და მიდის ძალიან მნიშვნელოვანი დათვლის პროცესი. გაუგებარია ქალაქის მერის განცხადება, რომელიც არც ელოდება რაიმე შედეგს და მათთვის არჩევნები არის მათი შიდა სქემით ჩატარებული არჩევნები. მათ პატივი უნდა სცენ შიდა პროცედურას და მერე ისაუბრონ", — განაცხადა ხოშტარიამ.

ხოშტარიას თქმით, ხელისუფლებამ გამოიყენა ადმინისტრაციული რესურსი და კრიმინალური ავტორიტეტები ერთად.

"ჩვენ იქ ვხედავდით უძლურ პოლიციას, როდესაც ეს ადამიანები ძალადობდნენ... მთელი დღის განმავლობაში ჩვენ ვხედავდით აბსოლიტურად აღვირახსნილ ხელოსუფლებას... ჩვენ ვაჩვენეთ არაერთი კონკრეტული ფაქტი ზეწოლის, რომ შემოეხაზათ 41, ჩვენ ვნახეთ ფიზიკური თავდასხმა, მუქარა, ეს იყო ის კლიმატი, რომელიც სააფრთხე იყო ქვეყნისთვის", — დასძინა მან.

ქართული ოცნების გენერალურმა მდივანმა, კახა კალაძემ მთაწმინდის ოლქში გამარჯვება ლადო კახაძეს არჩევნების დასრულებიდან 4 წუთში მიულოცა.