ჭუბერში მდინარე ნენსკრას შენაკადი მდინარე დევრულა ადიდდა. On.ge-სთან საუბარში მესტიის მერი, კახა ჟორჟოლიანი ამბობს, რომ ამ დროისთვის საშიშროება არ ემუქრება მოსახლეობას, თუმცა მისივე თქმით, ერთი ოჯახია დარჩენილი სოფელ მეკალმახეში, რომელიც მდინარის ადიდების გამო მოწყდა გარესამყაროს.

"რამდენიმე ადგილზე ჯებირი დაინგრა, ასევე, ორი ხიდი, მათ შორის, ერთი შიდასასოფლო — ჩამონგრეულია, მეორე მშენებარე ხიდის ნაწილები წაიღო. გზებია წაღებული რამდენიმე ადგილზე", — ამბობს მესტიის მერი.

მისივე ცნობით, თუ წვიმა არ იქნება, საშიშროება გადაივლის. ამჟამად ელოდებიან ტექნიკას და გეგმავენ ქვები ჩაყარონ იმ ადგილებზე, სადაც მდინარის ჯებირებიდან გადასვლის საშიშროებაა.

გასული წლის 5 ივლისს მესტიის მუნიციპალიტეტის სოფელ ჭუბერში, იქ სადაც ნენსკრა ჰესი შენდება, მთის ნაწილი ჩამოიშალა, რამაც ღვარცოფი გამოიწვია. მდინარის კალაპოტიდან გადმოსვლის გამო დაიტბორა მიმდებარე ტერიტორია, რამაც ათეულობით თემი გარე სამყაროს მოწყვიტა. უხვმა ნალექმა ჩამორეცხა სოფლებს შორის დამაკავშირებელი საავტომობილო გზები.