"აქ აკუსტიკა გვაქვს ისეთი, ნებისმიერ როკ-ჯგუფს შეშურდება" — ამ სიტყვებით მოუწოდა დარგობრივი ეკონომიკის კომიტეტის თავმჯდომარემ, რომან კაკულიამ დეპუტატებს სიჩუმისკენ. სხდომის დაწყებამდე მან აღნიშნა, რომ დარბაზში გადალაპარაკება ხმაურს იწვევს, ამიტომ დეპუტატებსა და ჟურნალისტებს სიჩუმის დაცვა სთხოვა.

ეს პირველი შემთხვევა არ არის, როდესაც პარლამენტში აკუსტიკა პრობლემას ქმნის. მას შემდეგ, რაც ქუთაისიდან თბილისში გადმოვიდნენ, დეპუტატებმა თქვეს, რომ თავის ტკივილები დაეწყოთ. მიზეზად ისინი ხმაურს ასახელებენ.

ხმაურის კი არა კამათით, არამედ სხდომათა დარბაზის აკუსტიკითაა გამოწვეული. განსაკუთრებით მძიმე მდგომარეობაში ბოლო რიგში მსხდომი დეპუტატები აღმოჩნდნენ. მათ On.ge-ს განუცხადეს, რომ არ ესმით, რას ლაპარაკობენ ტრიბუნასთან გასული კოლეგები, რა კანონპროექტს განიხილავენ და საერთოდ, რა ხდება პარლამენტში.

პარლამენტის აპარატში განმარტავენ, რომ სხდომათა დარბაზში აკუსტიკური მოწყობისთვის ბარიერს სვეტების განლაგება ქმნის. მათი თქმით, პრობლემის მოსაგვარებლად სამუშაოები უკვე დაწყებულია. თუმცა, უცნობია რა ბედი ელის დარბაზებს, სადაც კომიტეტების სხდომები იმართება.