აჭარის ტელევიზიის დირექტორობის კანდიდატს, დავით ჩხარტიშვილს არ მოსწონს გოგი გვახარიას საავტორო გადაცემა ანარეკლები. ამაზე კანდიდატმა გადაცემებზე საუბრის დროს თქვა.

"მაგალითად, პირდაპირ გეტყვით, რომ გვახარიას გადაცემა სრულიად არ მაკმაყოფილებს. ჩემი სიმპათიები გურამ ქართველიშვილის მიმართ იხრება (გააგრძელე საქართველოს ისტორია) და აუცილებლად აღდგება ეს პროექტი... ანუ გასაგებია ჩემი სიმპათიები, ხო?" — თქვა დირექტორობის კანდიდატმა მრჩეველთა საბჭოსთან გასაუბრების დროს.

ქართველიშილი გამოირჩევა დისკრიმინაციული გამონათქვამებით და ამ მხრივ ცნობილ გურამ ფალავანდიშვილის თანამოაზრეა. მაგალითად, ქართველიშვილმა 27 მაისს ფეისბუქზე ასეთი რამ დაწერა:

"მათი ბრძოლა ლიბერასტებისგან დაჩაგრულ მთელ საქართველოს უნდა გადაედოს. საკმარისია ღორობის თარეში".

ჩხარტიშვილს არ მოსწონდა ტელევიზიის გადაყენებული დირექტორის, ნათია კაპანაძის საქმიანობა.

"ჩემთვის თავიდანვე გაუგებარი იყო თქვენგან კაპანაძის არჩევა. კიდევაც ის შედეგი დადგა, რაც მოსალოდნელი იყო. ადამიანს, რომლის ამბიციაც ბევრად უსწრებდა კომპეტენციას, ჩააბარეს 8-მილიონიანი ორგანიზაცია", — ამ სიტყვებით დაიწყო მან საკუთარი ხედვის წარდგენა.

თუმცა, კაპანაძის დირექტორობის დროს ტელევიზია პირველად მოხვდა საერთაშორისო ორგანიზაციების ანგარიშში პოზიტიურად. მათ შორის ტელევიზიამ დადებითი შეფასება მიიღო Human Rights Watch-ის 2018 წლის ანგარიშშიც, როცა ეთერში რადიო თავისუფლების ის გადაცემა განათავსა, რომლებიც საზოგადოებრივი მაუწყებლის პირველმა არხმა დახურა.