გეი სიყვარულზე გადაღებული ახალი ქართული ფილმის, And Then We Denced პროდიუსერი, ქეთი დანელია ამბობს, რომ კულტურის სამინისტროსთან კანში ჯგუფის გასამგზავრებლად თანხის მიცემაზე ზეპირი შეთანხმება ჰქონდათ, თუმცა, შემდეგ უარი უთხრეს. ამის შესახებ მან რადიო თავისუფლებასთან ინტერვიუში ისაუბრა.

პროდიუსერის თქმით, ამის მიზეზად სამინისტროში განმარტეს, რომ "თანხის გამოყოფასა და ჩარიცხვას" ვეღარ ასწრებდნენ. ის ამბობს, რომ ფილმის ტრეილერის გამოქვეყნების შემდეგ სამინისტროდან დაურეკეს და ფილმის თემატიკაზე ჰკითხეს. დანელია აცხადებს, რომ სამინისტროს წარმომადგენელი დაინტერესდა, "ნამდვილად ჩოხებში ცეკვავდნენ თუ არა გეი ბიჭები".

"უბრალო ინტერესად ჩავთვალე. მეორე, დღეს კი მითხრეს, რომ იმ 2 500 ლარსაც ვეღარ მაძლევენ. არ ვიცი, რა ვიფიქრო. ძალიან მწყდება გული. ნახევარი ჯგუფი ჩაიხსნა, ვისაც უნდა წარედგინა ფილმი პრემიერაზე, რადგან საქართველოდან გასამგზავრებელი თანხა ვერ ვიშოვეთ. რომ არა ჩემი პარტნიორების და ჩემი პირადი თანხა მცირე ჯგუფითაც ვერ წავიდოდით ფესტივალზე", — ამბობს პროდიუსერი.

განათლების, მეცნიერების, კულტურისა და სპორტის სამინისტროს განცხადებით, სამგზავრო გრანტებს არ გასცემენ, ვინაიდან "ხელოვანთა მობილობის" პროგრამა ხორციელდება სსიპ შემოქმედებითი საქართველოს მიერ საკონკურსო შერჩევის გზით. გარდა ამისა, სამინისტრო განმარტავს, რომ ხელოვანისთვის სამგზავრო გრანტს გასცემს სსიპ საქართველოს კინემატოგრაფიის ეროვნული ცენტრი, რომელმაც თავის მხრივ უზრუნველყო კანის კინოფესტივალზე გასამგზავრებლად შემოქმედებითი ჯგუფის 6 წევრის დაფინანსება.

"საპროდიუსერო კომპანიამ თეიქს ფილმმა სთხოვა სამინისტროს კიდევ დამატებით გამოეყო 2500 ლარი. ვინაიდან საკითხი ეხებოდა "ა" კლასის, პრესტიჟულ ფესტივალში ფილმის მონაწილეობის საკითხს, სამინისტრომ თხოვნით მიმართა კინოცენტრს წარმოედგინა დაზუსტებული ინფორმაცია ფილმის ფესტივალში მონაწილეობისა და მისი მხრიდან დაფინანსების შესახებ.

კინოცენტრმა სამინისტროს მომართა 7 მაისს თხოვნით, განეხილა დამატებითი რესურსის გამოყოფის შესაძლებლობა. ფესტივალზე შემოქმედებითი ჯგუფის გასამგზავრებლად დარჩენილი იყო 5 სამუშაო დღე, რაც არასაკმარისია პროექტის დაფინანსების განსახილველად და დადგენილი პროცედურების განსახორციელებლად", — განუცხადა სამინისტრომ On.ge-ს.

16 მაისს კანის რიგით 72-ე კინოფესტივალზე ქართულ-შვედური ფილმის And Then We Danced მსოფლიო პრემიერა გაიმართება. ფილმი კანის კინოფესტივალის Director’s Fortnight სექციაში, 25 ფილმს შორის მოხვდა.

აღსანიშნავია, რომ პირველი ქართული სასიყვარულო გეი დრამის რეჟისორი ლევან აკინია, რომელიც წარმოშობით საქართველოდანაა.

აღწერაში ვკითხულობთ: "მერაბი ქართული ცეკვის ეროვნულ ანსამბლში მოსახვედრად მეწყვილესთან, მარისთან ერთად უკვე წლებია, ემზადება. მისი სამყარო მოულოდნელად იცვლება, როცა საცეკვაო დარბაზში ქარიზმატული და უდარდელი ირაკლი ჩნდება, რომელიც მისი მთავარი მეტოქე/სურვილის ობიექტი ხდება. არსებულ კონსერვატიულ გარემოში მერაბს რისკზე წასვლა უწევს".