თბილისის მერიამ წერეთლის გამზირზე სკვერის კეთილმოწყობის სამუშაოები ჩაატარა, რაც დედაქალაქის ბიუჯეტს 120 ათასი ლარი დაუჯდა. მერიის ინფორმაციით, სკვერი 21 სექტემბერს მოინახულა თბილისის მერმა დავით ნარმანიამ, თავის მოადგილესთან, გიგა ნიკოლეიშვილთან და დიდუბის რაიონის გამგებელთან ირმა ზავრადაშვილთან ერთად.

განახლებულ სკვერში არის ახალი სკამები, დეკორატიული მცენარეები, ფრინველებისა და ცხოველების ფიგურები, სასრიალო ბავშვებისთვის და ასევე ხის ხიდი, რომელიც დეკორატიულ წყალზეა გადებული. დეკორატიული წყლის ფუნქციას სკვერში ცისფერი კენჭები ასრულებს. გაზონის ნაცვლად, სკვერი მთლიანად ბეტონის ფილებითა და მცენარეებითაა მოწყობილი.

ფოტო: თბილისის მერია

მერიის პრესსამსახურმა სკვერის გახსნასთან დაკავშირებით გაავრცელა დავით ნარმანიას განცხადებაც, რომელმაც სკვერის მნიშვნელობაზე ისაუბრა:

"რაც ყველაზე მნიშვნელოვანია, მოსახლეობა ძალიან კმაყოფილია. მათ ამ მყუდრო და კეთილმოწყობილ სკვერში სრულფასოვანი დასვენებისა და სკვერში განთავსებული „მცირე ბიბლიოთეკის“ საშუალებით კითხვის საშუალებაც აქვთ“.

ფოტო: თბილისის მერია

მერიის ინფორმაციით, სკვერის სრული რეკონსტრუქცია მერიის ინიციატივით მიმდინარე პარკ-სკვერების რეაბილიტაციის პროგრამის ფარგლებში განხორციელდა. სკვერის კეთილმოწყობის სამუშაოები დიდუბის რაიონის გამგეობამ მიმდინარე წლის აგვისტოში დაიწყო და ერთი კვირის წინ დაასრულა.

ფოტო: თბილისის მერია

კეთილმოწყობილ სკვერში განთავსდა “მცირე ბიბლიოთეკა” წარწერით – “დააბრუნე ან შეცვალე“. ვიზიტორებს შეუძლიათ, სკვერში დასვენების დროს უფასოდ წაიკითხონ წიგნები ან სახლში წაიღონ და სანაცვლოდ სხვა წიგნი დააბრუნონ.