9 მაისს მოქალაქეთა ნაწილი ლანჩხუთის ცენტრში იოსებ სტალინის ბიუსტის დადგმას აპირებს. გურიის მოამბის ინფორმაციით, ბიუსტის ავტორი იური სარჯელაძეა.

საქართველოს კანონმდებლობით, ფაშისტური და კომუნისტური ტოტალიტარული იდეოლოგიის მატარებელი სიმბოლიკის, მათ შორის ბიუსტებისა და ძეგლების, საჯარო გამოყენება და დადგმა აკრძალულია.

ლანჩხუთის მუნიციპალიტეტის მერმა, ალექსანდრე სარიშვილმა On.ge-ს უთხრა, რომ ბიუსტის დადგმა მერიასთან შეთანხმებული არ იყო. მისი თქმით, ისინი კანონის ფარგლებში იმოქმედებენ. რაც შეეხება ბიუსტის კვარცხლბეკს, სარიშვილის განმარტებით, ის ცენტრში რამდენიმე წელია დგას.

"კვარცხლბეკი გამზადებულია რამდენიმე წელია. აქ იდგა წლების წინ სტალინის ბიუსტი. მერე ჩამოაგდეს, მერე ისევ დადგეს და ჩამოაგდეს. ამას გეუბნებით ბოლო 15 წლის ისტორიას", — განმარტა ლანჩხუთის მერმა და აღნიშნა, რომ სტალინის ბიუსტის დადგმას არ ეთანხმება.