პარლამენტში ქართული ოცნების დეპუტატი ნუკრი ქანთარია უქმე დღეებიდან 8 მარტის, ქალთა უფლებების დაცვის საერთაშორისო დღის ამოღებასა და 14 მაისს, თამარ მეფის ხსენების დღეს, სამშობლოს დღის დაწესებას ითხოვს. გარდა ამისა, ის ამბობს, რომ 14 მაისი უქმე დღედ უნდა გამოცხადდეს. დეპუტატმა შრომის კოდექსში შესატანი ცვლილებებისთვის კანონპროექტი მოამზადა, რომლის ბიუროზე დარეგისტრირებას 6 მაისს გეგმავს.

როგორც დეპუტატმა On.ge-ს უთხრა, ქვეყანაში არ გვაქვს ემოციური, პოზიტიური და ცოდნაზე დამყარებული დღეები, რომელიც "ჯანსაღ პატრიოტიზმს განავითარებს". რაც შეეხება 8 მარტის ამოღებას, მისი თქმით, 15 დასვენების დღიდან ერთ-ერთი უნდა გაუქმდეს, რათა ეკონომიკაზე გავლენა არ იქონიოს. მისივე განმარტებით, 8 მარტი ერთადერთი შესაძლო ვარიანტია, თუმცა ამაზე მსჯელობა შეიძლება.

"8 მარტი დასვენების დღედ ჩვენს ქვეყანაში, რუსეთსა და მოლდოვეთში გამოცხადდა. არც იყო ადრე [დასვენების დღე], გაუქმებული იყო, მერე შემოვიდა დედის დღე და დედის დღე დარჩა. ამიტომ ერთადერთი შესაძლებელი [ვარიანტია], თუმცა შეიძლება სხვა დღეზეც ვიფიქროთ", — განაცხადა ნუკრი ქანთარიამ.