ამ 10 კითხვაზე პასუხის გაცემა სინამდვილეში არც არავის სიამოვნებს

ოჯახის წევრებთან, მეგობრებთან, თანამშრომლებთან, ან უბრალოდ უცნობებთან კომუნიკაცია თითქმის ყოველდღიურად გვიწევს და როგორც წესი, ვრცელი თუ ძალიან ხანმოკლე საუბარი კითხვა-პასუხის რეჟიმში მიდის.

თუმცა, არსებობს წითელი ხაზები, რომელთა გადაკვეთის მომენტშიც უსიამოვნო განცდა გვეუფლება და ერთი სული გვაქვს, რომ ეს საუბარი, რაც შეიძლება სწრაფად დავასრულოთ.

"როდის თხოვდები?", "ხელფასი რამდენი გაქვს?" "ასე სწრაფად როგორ დაიკელი?" — ეს იმ "ჩვეულებრივი" კითხვების მცირე ჩამონათვალია, რომელზე პასუხის გაცემაც სინამდვილეში არც არავის სიამოვნებს.

არასასიამოვნო კითხვები ძირითადად ასე ჟღერს:

1. შეყვარებული არ გყავს?

როცა არასასიამოვნო კითხვებზე ვსაუბრობთ, რა თქმა უნდა, მაშინვე პირად ცხოვრებასთან დაკავშირებული კითხვები გვახსენდება. ვაღიაროთ, რომ "შეყვარებული არ გყავს?!" — 6, 17, თუ 26 წლის ასაკში ერთნაირად გამაღიზიანებელი მოსასმენია.

2. ცოლი როდის მოგყავს / როდის თხოვდები?

ასაკის მატებასთან ერთად, პირველი კითხვის ფორმულირებაც სახეს იცვლის და დაახლოებით ასე ჟღერს: ცოლი როდის მოგყავს?! / გათხოვებას არ აპირებ?! — როცა დავაპირებთ, გეტყვით!

3. ბავშვს არ აპირებთ?

კითხვები ერის გამრავლებაზეც საკმაოდ ცუდი მოსასმენია. არასამართლიანად ჩნდება განცდა, რომ მთელი ქვეყანა ელოდება შენს ბავშვს, შენ კი ცუდი ტიპი ხარ და ბავშვები არ გიყვარს.

4. რამდენი მეგობარი გყავს?

მოდი და გაიგე რისი გარკვევა სურს ამ კითხვის ავტორს — რამდენად მეგობრულები ვართ, ნაცნობებსაც კი მეგობრებს ვეძახით, თუ ასოციალური ტიპები რომ ვართ? ასეა?

5. მაგისტრატურას არ აპირებ?

არ გვჭირდება ქვეყანაში ადამიანები, რომლებიც მაგისტრატურაზე აბარებენ, მერე კი საგნები რჩებათ!

6. ამაში რა მიეცი?

ყველაფერი ასე იწყება: რა ლამაზია, ძალიან გიხდება, ესეთი არსად მინახავს, მაგრამ ყველა გზა მაინც "რა ღირდა?"-მდე მიდის.

7. ხელფასი რამდენი გაქვს?

საკმარისია. ამჯერად ფინჯან ყავაზე დაგპატიჟებ და მეორე პაემანზე თამამად გეტყვი — არა!

8. რომელ სუნამოს ხმარობ?

განსაკუთრებულად უხერხულია, როცა სუნამო საერთოდ არ გასხია და უბრალოდ შენს დეოდორანტს აქვს ასეთი სასიამოვნო სუნი. პასუხიც უხერხულად ჟღერს — რავი, დეოდორანტი.

9. საით მიდიხარ?

რუსთავში.

10. ასე მალე როგორ დაიკელი?

თითქოს ვარჯიშისა და სწორი კვების გარდა, რამე მაგიური რეცეპტი არსებობდეს.

ბოლო ამბები:

გირჩევთ