საქართველოში მცხოვრები საუდელი დები დახმარებას ითხოვენ. ტვიტერში შექმნილი სპეციალური ანგარიშით დები საკუთარ მდგომარეობაზე ყვებიან და ამტკიცებენ, რომ მშობლიურ ქვეყანაში დაბრუნების შემთხვევაში, სიკვდილი ელით. ისინი დახმარებას გაეროს დევნილთა უმაღლეს კომისარიატსაც სთხოვენ.

"ჩვენ საუდელი დები ვართ, მე მაჰა მქვია, ჩემს დას ვაფა. ჩვენ საფრთხეში ვართ. გვჭირდება დაცვა და თქვენი მხარდაჭერა, რომ ჩვენი ხმა ყველამ გაიგოს. გვინდა ისეთი ქვეყანა, რომელიც მიგვიღებს და ჩვენს უფლებებს დაიცავს. გთხოვთ დაგვეხმაროთ! საუდის მთავრობამ პასპორტები გაგვიუქმა. ახლა ჩვენ საქართველოში ვართ".

ერთ-ერთი და, ვაფა კი ამტკიცებს, რომ საქართველოში უკვე ჩამოვიდნენ მისი მამა და ძმები, რომლებიც ეძებენ.

"ჩვენ ოჯახის მხრიდან ზეწოლას გამოვექეცით, რადგან საუდის არაბეთის კანონი ზედმეტად სუსტია იმისათვის, რომ დაგვიცვას", — ამბობს ვიდეომიმართვაში ერთ-ერთი და.

შინაგან საქმეთა სამინისტროში On.ge-ს განუცხადეს, რომ საუდელ დებს დახმარების მოთხოვნით მათთვის არ მიუმართავთ.