თბილისის საქალაქო სასამართლომ გულგრილობისთვის ბრალდებულ ლიფტის ხელოსანს 4-წლიანი პატიმრობა მიუსაჯა. საქმე ეხება 2017 წელს მომხდარ ამბავს, რა დროსაც ბავშვმა გარღვეული ლიფტის შახტის დამცავი ლითონის ბადის ღიობში თავი შეყო და სიცოცხლისთვის შეუთავსებელი დაზიანებები მიიღო.

გამოძიების მტკიცებით, შპს ვერტიკალი 777-ის სპეციალური წარმომადგენელი იყო პასუხისმგებელი ლიფტის უსაფრთხო ექსპლუატაციაზე. ბრალდების მხარის განცხადებით, მან არ შეასრულა მასზე დაკისრებული ვალდებულებები, კერძოდ, მისდამი დაუდევარი დამოკიდებულების გამო არ შეამოწმა და არ შეაკეთა კორპუსის მე-2 სადარბაზოს მე-7 სართულზე ლიფტის შახტის გარღვეული ლითონის მავთულბადე.

ლიფტის სპეციალისტს ბრალდება 2018 წლის 28 ივნისს, სისხლის სამართლის კოდექსის 220¹ მუხლის მე-2 ნაწილით წარედგინა (ორგანიზაციაში სპეციალური უფლებამოსილების მქონე პირის მიერ თავისი სამსახურებრივი მოვალეობის შეუსრულებლობა მისდამი დაუდევარი დამოკიდებულების გამო, რამაც ადამიანის სიცოცხლის მოსპობა გამოიწვია).