თბილისში ტაქსის მძღოლები საპროტესტო აქციას გამართავენ. ისინი მოითხოვენ ქალაქის მერმა უარი თქვას დაწესებულ რეგულაციებზე. მათი თქმით, მთავარი მოთხოვნაა მარჯვენასაჭიანი და B კატეგორიის მანქანებს მგზავრების გადაყვანის უფლება დართონ. ასევე, 2021 წლამდე გადაიდოს ფერზე აკრძალვა.

ტაქსის მძღოლებს ისევ უერთდებიან ლეიბორისტული პარტიის წარმომადგენლები. რუსთავი 2-ის ინფორმაციით მსვლელობა აგრარული უნივერსიტეტიდან დაიწყება და ბიძინა ივანიშვილის რეზიდენციასთან დასრულდება.

ტაქსის მძღოლებმა აქცია აქამდეც გამართეს. აქციის შემდეგ შეიქმნა სამუშაო ჯგუფი, რომელიც ქალაქის მერთან მოლაპარაკებებს აწარმოებდა.

ახალი რეგულაციები

თბილისში 2019 წლის პირველი ოქტომბრიდან თეთრი ფერის ტაქსები იმოძრავებენ. ამის შესახებ თბილისის მერმა, კახა კალაძემ დედაქალაქის მთავრობის 26 სექტემბრის სხდომაზე განაცხადა.

პირველი ოქტომბრიდან ტაქსის სერვისის განხორციელებას ვერ შეძლებენ სამკარიანი და მარჯვენა საჭიანი ავტომობილები.

კახა კალაძის ინფორმაციით, მოცემულ ეტაპზე, ტაქსის სერვისის განხორციელებაზე 6 200-ზე მეტი ნებართვაა გაცემული. პირველი ოქტომბრიდან კი, ამ საქმიანობის შესაბამისი ლიცენზიის გარეშე განხორციელება 200 ლარით დაჯარიმდება.

კახა კალაძე ამბობს, რომ სატრანსპორტო პოლიტიკის მეორე ეტაპია ვიზუალური სტანდარტი, ყველა ტაქსი მომავალი წლის პირველი ოქტომბრიდან თბილისში თეთრი უნდა იყოს