სამყარო ნეტფლიქსის სერიალ The Crown-ის მესამე სეზონის მოლოდინშია. შოუს შემქმნელებმა ახალი დედოფალი უკვე იპოვეს, ელიზაბეტ მეორეს როლზე კლერ ფოის სულ მალე ოლივია კოლმანი შეცვლის. დადასტურდა ისიც, რომ ელიზაბეტის დის, მარგარეტის როლს ლეგენდარული ბრიტანელი მსახიობი ჰელენა ბონემ კარტერი მოირგებს.

თუმცა, სანამ მესამე სეზონი დღის სინათლეს იხილავს, The Crown-ის პროდიუსერებმა გაამხილეს, რომ შოუს მეოთხე სეზონში პრინცესა დაიანას პერსონაჟი გამოჩნდება, მის როლს კი ემა კორინი შეასრულებს.

პრინცესა დაიანას როლი კორინისთვის პირველი მნიშვნელოვანი როლი იქნება. წინასწარი ცნობებით, ის დაიანას როლს მხოლოდ ორი სეზონის განმავლობაში შეასრულებს, თუმცა ეს ჯერ დადასტურებული არ არის.

ლედი დის გარდა, მეოთხე სეზონში გამოჩნდება მსახიობი ჯილიან ანდერსონიც, რომელიც ბრიტანეთის პრემიერ-მინისტრის, მარგარეტ ტეტჩერის როლს მოირგებს.