მოძრაობა სახელმწიფო ხალხისთვის ლიდერი პაატა ბურჭულაძე მიიჩნევს, რომ მარიხუანა ექიმის რეცეპტით უნდა იყიდებოდეს აფთიაქებში და ნარკომანებს არ უნდა ეშინოდეთ ექიმთან მისვლის. ამის შესახებ მან პალიტრა ნიუსის ეთერში ისაუბრა, როცა ჟურნალისტმა მას მსუბუქი ნარკოტიკის მოხმარების დეკრიმინალიზებაზე ჰკითხა:

"თვითონ მარიხუანის გაყიდვა უნდა ხდებოდეს არა გადამყიდველების მიერ, არამედ აფთიაქებში. ჩემი აზრით, ექიმი უნდა უწერდეს რეცეპტს იმიტომ, რომ ამითი ჩვენ აღმოვფხვრით ძალიან დიდ კონტრაბანდას და ამას გავხდით ძალიან ნორმალურს. არ შეიძლება, რომ ხანდახან არ გაიზიარო ის, რაც ევროპის ქვეყნებშია. მე, მაგალითად, მომწონს ის, რომ ზუსტად ეგეთი პირობებია ნიდერლანდებში, ავსტრიაში და მე ამას ვემხრობი. საერთოდ, ნარკომანს არ უნდა ეშინოდეს იმისა, რომ მას დაიჭერენ და მალავდეს, რომ ის არის ნარკომანი. ადამიანი როცა ხვდება, რომ ის არის ნარკომანი, შეუძლია მივიდეს ექიმთან და ექიმმა უნდა უმკურნალოს. ეს არის ერთადერთი გზა მათი გამოჯანმრთელების, რომ ის არ მალავდეს, მივიდეს ექიმთან და ექიმმა გამოუწეროს მას რეცეპტი".