On.ge-ს ინფორმაციით, პოლიციამ თეთრი ხმაურის კიდევ ერთი წევრი დავით სუბელიანი დააკავა.

შინაგან საქმეთა სამინისტროში დაკავებულების შესახებ ზუსტ ინფორმაციას ამ დრომდე ვერ იძლევიან. აქციის მონაწილეების თქმით, კი დაკავებულია, სავარაუდოდ, 4 ადამიანი.

ჭავჭავაძის #5-ში მიმდინარე აქციაზე ერთმანეთს პოლიცია და დემონტრანტები დაუპირისპირდნენ. მდგომარეობა მას შემდეგ დაიძაბა, რაც აქციის მონაწილეებმა ჭავჭავაძის გამზირის გადაკეტვა სცადეს.

სამუშაო ადგილებზე შრომის უსაფრთხოების დაცვის მოთხოვნით გამართული აქციის წევრები აცხადებენ, რომ მინისტრების მოსვლამდე არ დაიშლებიან. დემონსტრანტები პრემიერ-მინისტრთან, მამუკა ბახტაძესთან, ჯანდაცვისა და ეკონომიკის მინისტრებთან, დავით სერგეენკოსთან და გიორგი ქობულიასთან, ასევე თბილისის მერთან, კახა კალაძესთან შეხვედრას მოითხოვენ. ისინი ხელისუფლების წარმომადგენლებს დროს 23:00-მდე აძლევენ. აქცია 7 საათიდან მიმდინარეობს. აქციის მონაწილეებს თბილისის მერი გამოეხმაურა და განაცხადა, რომ მზად არის დემონსტრანტებს სამუშაო ფორმატში შეხვდეს. აქციის მონაწილეები შეთავაზებას არ თანხმდებიან და ამბობენ, რომ "მრგვალი მაგიდების დრო წავიდა".