მოსწავლე ახალგაზრდობის სასახლეში თბილისის მერმა, დავით ნარმანიამ ორწლიანი საქმიანობის ანგარიშის პრეზენტაცია გამართა. როგორც მან აღნიშნა, სექტემბრის ბოლოდან თბილისში ეტაპობრივად ახალი, ევროსტანდარტების შესაბამისი, ადაპტირებული და ეკოლოგიურად სუფთა საწვავზე მომუშავე MAN-ის ავტობუსები შემოვა:

"თბილისის მერია ევროპის რეკონსტრუქციისა და განვითარების ბანკის მხარდაჭერით, ავტოპარკს 2017 წლის თებერვლამდე 143 ერთეული Man Truck and Bus AG-ის ავტობუსით განაახლებს. პროცესი ამით არ სრულდება და თბილისის მერიას ავტოპარკის განახლების 4 წლიანი გეგმა აქვს".

მისი თქმით, 2016 წლის ივლისში მასშტაბური ინფრასტრუქტურული პროექტის - მუნიციპალური ავტობუსების ავტობაზის მშენებლობა დაიწყო. ნარმანიას განმარტებით, ავტოპარკი ევროსტანდარტებზე მორგებული ობიექტებით მუნიციპალურ MAN-ის ავტობუსებს სრულყოფილ მომსახურებას გაუწევს:

"ჩვენ დავიწყეთ მეტროს ვაგონების მოდერნიზაცია. მოდერნიზებულია 4 ვაგონი. კაპიტალურად შეკეთდა 8 ვაგონი, რისთვისაც სატრანსპორტო კომპანიამ 7,5 მილიონი ლარი დახარჯა. წლის ბოლომდე დასრულდება 4 ვაგონის მოდერნიზაცია".

თბილისის მერის თქმით, აღდგა კუს ტბის საბაგირო გზაც და განახლებული საბაგირო დღის განმავლობაში 3 500 მგზავრის გადაყვანას შეძლებს. აღსანიშნავია, რომ გონდოლები ადაპტირებულია შშმ პირებისათვის, ვაგონები აღჭურვილია ველოსიპედის ჩამოსაკიდი მოწყობილობით:

"შემუშავებულია საცობების მართვის 5-პუნქტიანი სამოქმედო გეგმა. ერთ-ერთი პრიორიტეტული მიმართულებაა მიწისქვეშა და მიწისზედა მრავალსართულიანი ავტოსადგომებისა და პარკინგის ადგილების შექმნა".

მისივე თქმით, მნიშვნელოვანი სიახლეა თბილისში 700 ახალი, თანამედროვე სტანდარტების შესაბამისი მოსაცდელების დამონტაჟდება. ნანმანიას განცხადებით, ამჟამად, ჯამში 200 მოსაცდელი თბილისის მასშტაბით სხვადასხვა უბნებში უკვე დამონტაჟებულია.