თურქეთში ადგილობრივ არჩევნებში მონაწილე ოპოზიციური პარტიის ცნობით, ქვეყნის აღმოსავლეთში, კერძოდ მალათიის პროვინციაში მათი ორი წევრი მოკლეს. ტემელ კარამოლუღლუ ტვიტერზე წერს, რომ მოკლულუა ორი დამკვირვებელი, მათ შორის ერთი მოხალისე. მისივე ცნობით, პარტიის წევრებს თურქეთის მმართველი ძალის სამართლიანობისა და განვითარების პარტიის კანდიდატის ნათესავი დაესხა თავს. BBC-ის ცნობით, ჩხუბი მას შემდეგ დაიწყო, რაც ამომრჩეველმა უარი თქვა საარჩევნო კაბინაში შესვლაზე და მოინდომა კანდიდატი ღია სივრცეში შემოეხაზა.

დღეს, 31 მარტს თურქეთში ადგილობრივი არჩევნები იმართება, რაც განსაზღვრავს, დაკარგავს თუ არა კონტროლს ერდოღანის მმართველი პარტია თურქეთის ყველაზე დიდ ქალაქებზე, სტამბოლსა და ანკარაზე. ადგილობრივ არჩევნებზე 57 მილიონზე მეტი ამომრჩეველი 81 პროვინციაში აირჩევს მერებსა და გამგებლებს. ერდოღანის თქმით, ეს არჩევნები განსაზღვრავს ქვეყნის "გადარჩენისა" და მისი პარტიის საკითხს.

არჩევნებზე ერთმანეთს ორი სხვადასხვა ფრთა უპირისპირდება, მათ შორისაა, მმართველი ძალა სამართლიანობისა და განვითარების პარტია და ნაციონალისტური მოძრაობის პარტია. მეორე — ოპოზიციური ძალა, რესპუბლიკური პარტია და კარგი პარტია.

2002 წელს მმართველობაში მოსვლის შემდეგ ერდოღანის პარტიამ ყველა არჩევნები მოიგო, თუმცა ანალიტიკოსების აზრით, ეს პირველი შემთხვევაა, როდესაც ისინი გამარჯვებაში დარწმუნებულები აღარ არიან.

2017 წლის რეფერენდუმის შედეგად თურქეთის საპრეზიდენტო რესპუბლიკად გარდაქმნის შემდეგ ეს პირველი ადგილობრივი არჩევნებია.