თბილისის მერის კახა კალაძის თქმით, თეთრად შეღებილ (A კატეგორიის) ტაქსის მძღოლებს მერიისგან უფასოდ გადაეცემათ სპეციალური მანათობელი. კახა კალაძემ დღეს, 27 მარტს თბილისის მთავრობის სხდომაზე წარმოადგინა მანათობლის ნიმუში. მისი თქმით, თუ ტაქსი დაკავებულია, მისი მანიშნებელი წითლად აინთება, ხოლო დღის განმავლობაში ექნება ჩვეულებრივი ფერი.

თბილისის მერის განცხადებით, ტაქსის მანათობლებზე გამოცხადებული იყო ინტერესთა გამოხატვა და გამარჯვებული კომპანიაა აი თი ჯი ჯორჯია.

ახალი რეგულაციები

თბილისში 2019 წლის პირველი ოქტომბრიდან თეთრი ფერის ტაქსები იმოძრავებენ. ამის შესახებ თბილისის მერმა, კახა კალაძემ დედაქალაქის მთავრობის 26 სექტემბრის სხდომაზე განაცხადა.

პირველი ოქტომბრიდან ტაქსის სერვისის განხორციელებას ვერ შეძლებენ სამკარიანი და მარჯვენა საჭიანი ავტომობილები.

კახა კალაძის ინფორმაციით, მოცემულ ეტაპზე, ტაქსის სერვისის განხორციელებაზე 6 200-ზე მეტი ნებართვაა გაცემული. პირველი ოქტომბრიდან კი, ამ საქმიანობის შესაბამისი ლიცენზიის გარეშე განხორციელება 200 ლარით დაჯარიმდება.

კახა კალაძე ამბობს, რომ სატრანსპორტო პოლიტიკის მეორე ეტაპია ვიზუალური სტანდარტი, ყველა ტაქსი მომავალი წლის პირველი ოქტომბრიდან თბილისში თეთრი უნდა იყოს.