შინაგან საქმეთა სამინისტროს ცნობით, დაკავებულია წარსულში სხვადასხვა მძიმე დანაშაულისთვის ნასამართლევი სამი პირი. მათ შორის, ე.წ. ქურდული სამყაროს წევრობის ბრალდებით, დაკავებულია ორი კრიმინალური ავტორიტეტი, ხოლო ე.წ. კანონიერი ქურდისთვის მიმართვის ბრალდებით — მესამე პირი. სამართალდამცველებმა, ისინი 23 მარტს დააკავეს.

გამოძიების ვერსიით, ერთ-ერთმა ბრალდებულმა, რომელიც კერძო კომპანიის მეწილეა, თავისივე ბიზნესპარტნიორთან დავის გადასაწყვეტად, დახმარებისთვის ორ ნაცნობ კრიმინალურ ავტორიტეტს მიმართა. შსს-ს ინფორმაციით, მან კრიმინალური გავლენის გამოყენებით, დავის მის სასარგებლოდ გადაწყვეტა სთხოვა.

უწყების მტკიცებით, აღნიშნული პირები შეხვდნენ ბრალდებულის ბიზნესპარტნიორს, მას გაეცნენ საზღვარგარეთ მცხოვრები ე.წ. კანონიერი ქურდის ზაალ მახარობლიძის (მეტსახელად გლეხოვიჩის) წარმომადგენლებად და კომპანიის მნიშვნელოვანი წილის დათმობა მოსთხოვეს.

გამოძიებამ დაადგინა, რომ ბიზნესპარტნიორებს შორის დავის გადაწყვეტა ე.წ. კანონიერ ქურდთან სატელეფონო კომუნიკაციის საშუალებით გაგრძელდა. ზაალ მახარობლიძემ მხარეებს შორის უთანხმოება თავისი კრიმინალური გავლენის გამოყენებით, ე.წ. ქურდული წესებით, ბრალდებულის სასარგებლოდ გადაწყვიტა.

გამოძიება ე.წ. ქურდული სამყაროს წევრობისა და ე.წ. კანონიერი ქურდისადმი მიმართვის ფაქტებზე, საქართველოს სისხლის სამართლის კოდექსის 223¹ მუხლის 1-ლი ნაწილით და 2234 მუხლის 1-ლი ნაწილით მიმდინარეობს.