სასწრაფო სამედიცინო დახმარების პრესსამსახურში, On.ge-ს განუცხადეს რომ გაზით მოწამვლის ჩივილების მიზეზით, ჯამში 15 გამოძახება დაფიქსირდა, აქედან ოთხმა უარი თქვა, 11 კი, გადაიყვანეს საავადმყოფოში:

"ჩვენ ვერაფერს გეტყვით მოწამვლის ფაქტებზე, მხოლოდ იყო პირღებინების, თავის ტკივილისა და ყელის წვის ჩივილები".

დღეს, 14 სექტემბერს, თბილისის რამდენიმე უბანში გაზის სუნმა საგრძნობლად იმატა. როგორც საგანგებო სიტუაციების სამსახურის პრესსამსახურში On.ge-ს განუცხადეს, მათ მთელი ქალაქის მასშტაბით რამდენიმე გამოძახება მიიღეს და უსაფრთხოების მიზნით, ადგილებზე ჯგუფები გაგზავნეს.

გადაუდებელი დახმარების სამსახურმა On.ge-ს აცნობა, რომ ვერასა და ვაკე-საბურთალოს რაიონებში ოდორანტებია გაშვებული.

ანალოგიური განმარტება გააკეთა ყაზტრანსგაზ-თბილისმაც.

მათი თქმით, საქართველოს გაზის ტრანსპორტირების კომპანიის მიერ მუდმივად ხორციელდება ბუნებრივი აირისათვის დამახასიათებელი სუნის მიცემა, სპეციალური ნივთიერების, ოდორანტის, დამატების საშუალებით, იმ მიზნით, რომ მარტივად მოხდეს ბუნებრივი გაზის გაჟონვის აღმოჩენა.

ყაზტრანსგაზის ცნობით, ოდორიზაციის პროცესზე შპს ყაზტრანსგაზ-თბილისი პასუხისმგებელი არაა. კომპანიის განმარტებით, აღნიშნული დანამატი ადამიანის ჯანმრთელობისთვის საფრთხეს არ წარმოადგენს.