რუსთავი 2-ის გენერალურმა დირექტორმა ნიკა გვარამიამ, ტელეკომპანია პირველის ეთერში, ინგა გრიგოლიასთან ინტერვიუში ფარული აუდიო ჩანაწერის გავრცელებასთან დაკავშირებით ისაუბრა. მისი განცხადებით, გავრცელებულ მასალაში სკანდალური შინაარსობლივად არაფერი ყოფილა, რადგან პაატა ბურჭულაძესთან ხანგრძლივი ურთიერთობა აკავშირებს. მისივე თქმით, მას სხვა ბევრ პოლიტიკოსთან აქვს კომუნიკაცია:

"ამ მასალაში სკანდალური არის ჩაწერის ფაქტი. თავისთავად ცხადია ეს ჩანაწერი გამოქვეყნებულია სუს-ის მიერ, მასში შინაარსობლივი თვალსაზრისით სკანდალური არაფერია. მე და ბატონ პაატას გვაკავშირებს ხანგრძლივი ურთიერთობა და ვიტყოდი, რომ მეგობრული ურთიერთობა, მე მისი გულშემატკივარი ვარ და კიდევ ბევრ ადამიანს ვგულშემატკივრობ, ვინც იღებს არჩევნებში მონაწილეობას და ვინც აპირებს სუს-ის მეთოდებით მმართველი ხელისუფლების ქართული ოცნების და პირადად ბიძინა ივანიშვილის დამარცხებას.

მე მაქვს კომუნიკაცია ყველა მათგანთან, ვგულისხმობ პროდასავლურ ძალებს, ვინც ჩვენი სარედაქციო პოლიტიკისთვის მისაღებია. ეს არ არის ერთი პარტია, აგერ დადასტურდა, რომ სააკაშვილის გარდა პაატა ბურჭულაძესაც ვესაუბრები, გუშინ ვესაუბრე შალვა ნათელაშვილს, მაქვს კომუნიკაცია ირაკლი ალასანიასთან და არამხოლოდ პარტიის ლიდერებთან, ასევე პარტიის წევრებთანაც, მაგალითად, თინა ხიდაშელთან რამდენიმე მესიჯი მაქვს მიწერილი ბოლო დღეების განმავლობაში".

გვარამიას თქმით, მთავარია არა მისი და ბურჭულაძის საუბრის შინაარსი, არამედ ის რომ მოსმენები ისევ გრძელდება. შინაგან საქმეთა სამინისტროს მიერ გამოძიების დაწყებასთან დაკავშირებით კი მან აღნიშნა, რომ აზრი არ აქვს, რადგან დამნაშავე მხოლოდ სახელმწიფოა:

"ეს საუბარი იყო ღია ხაზით, რაზეც შეუზღუდავად მიუწვდება ხელი არსებული კანონმდებლობით სახელმწიფოს, ასევე ხელი მიუწვდება ჯეოსელს, რადგან მე და ბატონ პაატას ჯეოსელი გვაქვს და ასევე აშშ-ს სახელმწიფოს. თუ სახელმწიფო აპირებს გამოძიების დაწყებას ამ ორი ფიგურის წინააღმდეგ და კითხვები აქვს აშშ-ს ხელისუფლებასთან, რომლის მეშვეობითაც ხორციელდება როუმინგი, ან შეკითხვები აქვთ კერძო პროვაიდერთან მაშინ უნდა გვითხრას ეს".

ნიკა გვარამია ასევე აღნიშნავს რომ გავრცელებული აუდიო ჩანაწერი არასრულყოფილი და დამონტაჟებულია:

"ეს ჩანაწერი არ არის სრული და ბატონმა პაატამ შემახსენა, თუ გახსოვს მე იმ საუბარში გეუბნები რომ მე არც სააკაშვილის ვარ და არც ხელისუფლების, და რატომ თქვა მეგრელიშვილმა ასეთი რამ, მე ვადასტურებ რომ მან ასეთი რამ ნამდვილად მითხრა, ამ გამოქვეყნებულ ვერსიაში, ეს მონაკვეთი არ არის და დამონტაჟებულია".

სახელმწიფო უსაფრთხოების სამსახურმა On.ge-სთან საუბარში განაცხადა, რომ უწყება უარყოფს გვარამიას ბრალდებას და რომ ამასთან დაკავშირებით, შსს-მ უკვე დაიწყო გამოძიება.