მას შემდეგ, რაც საპარლამენტო უმრავლესობის წევრმა, ირაკლი სესიაშვილმა გირჩის რელიგიური ორგანიზაცია, ბიბლიური თავისუფლება კორუფციაში დაადანაშაულა, პარტიის ლიდერმა გადაწყვიტა დეპუტატისთვის კორუფციის მნიშვნელობა განემარტა.

"ბიბლიურ თავისუფლებაში კორუფცია ვერ იქნება, რადგან მას არ აქვს შეხება ე.წ. საბიუჯეტო თანხებთან, ანუ ხალხისთვის გადასახადების სახით წართმეულ ფულთან. სიტყვა კორუფციის მნიშვნელობა არ გესმით", — დაწერა ჯაფარიძემ ფეისბუქზე.

"საჯარო მოსამსახურის მიერ თანამდებობის ან მასთან დაკავშირებული შესაძლებლობის გამოყენება კანონით აკრძალული ქონებრივი ან სხვა სიკეთის მიღების მიზნით, აგრეთვე მისთვის ამ სიკეთის გადაცემა ან მის მიღებასა და დაკანონებაში ხელის შეწყობა", — კანონის განმარტება.

გირჩის ლიდერმა კორუფციის მნიშვნელობის ასახსნელად მოქმედ დეპუტატსა და თავდაცვის კომიტეტის თავმჯდომარეს კორუფციის შესაძლო შემთხვევების რამდენიმე მაგალითი მოუყვანა:

  • თავდაცვისა და უშიშროების კომიტეტის თავმჯდომარე თავის შვილს არ უშვებს ე.წ. სავალდებულო სამხედრო სამსახურში და სხვების შვილებს აიძულებს პოლიციის ძალით;
  • თავდაცვისა და უშიშროების კომიტეტის თავმჯდომარის შვილს რატომღაც აღმოაჩნდება განსაკუთრებული ინტერესი მამის მიერ, თუნდაც ფორმალურად, კურირებულ სფეროზე და საქმდება სახელმწიფო უსაფრთხოების სამსახურში;
  • თავდაცვისა და უშიშროების კომიტეტის თავმჯდომარე საკუთრებაში არსებულ ნახევარმილიონიან უძრავ ქონებას ასაღებს 15-ჯერ იაფად;
  • თავდაცვისა და უშიშროების კომიტეტის თავმჯდომარე აპირებს ერთ რელიგიურ კონფესიას მიანიჭოს პრივილეგია საპატრიარქოს დაკვეთით.

13 მარტს თავდაცვის კომიტეტის თავმჯდომარე ირაკლი სესიაშვილმა ახალი საკანონმდებლო ინიციატივის შესახებ ინფორმაცია გააჟღერა, რომლის მიხედვითაც არამართლმადიდებელ მღვდელმსახურებს ჯარში წასვლა მოუწევთ. მოგვიანებით, დეპუტატმა აღნიშნა, რომ მღვდელმსახურების მოწმობების გაცემით გირჩის რელიგიური ორგანიზაცია 20-დან 100 ლარამდე თანხას იღებდა და ეს კორუფციულ რისკებს შეიცავდა.