თავდაცვის სამინისტროს სამხედრო პოლიციაში აცხადებენ, რომ კრწანისში წვევამდელ ქაზიმ კახრამანოვზე სავარაუდო ძალადობისა და თანხის გამოძალვის საქმეზე ორი სავალდებულო სამხედრო მოსამსახურის შესაძლო დანაშაულებრივი ქმედება იკვეთება.

როგორც ბრიფინგზე სამხედრო პოლიციის წარმომადგენელმა, ირაკლი ბაზერაშვილმა განაცხადა, გამოძიების დასრულებამდე ამ ქვედანაყოფის სამეთაურო რგოლს უფლებამოსილება შეუჩერდება. მისივე თქმით, ფაქტის დადასტურების შემთხვევაში, შესაძლოა, სამხედრო ქვედანაყოფის ხელმძღვანელი პირების თანამდებობრივი პასუხისმგებლობის საკითხი დადგეს.

საქმეზე გამოძიება სისხლის სამართლის კოდექსის 181-ე და 386-ე მუხლებით მიმდინარეობს, რაც ურთიერთდაუქვემდებარებელ სამხედრო მოსამსახურეებს შორის დამოკიდებულების წესის დარღვევასა და ფულის გამოძალვას გულისხმობს.

სამხედრო მოსამსახურე, ქაზიმ კახრამანოვი ამტკიცებს, რომ მეთაურის თანდასწრებით ფული მოსთხოვეს, უარის შემდეგ კი სცემეს.