თბილისის საქალაქო სასამართლომ პარლამენტარ გივი თარგამაძის მკვლელობის მცდელობის საქმეში ბრალდებულს დარჩო ხეჩუაშვილს 18-წლიანი პატიმრობა მიუსაჯეს. ხეჩუაშვილი ამ დრომდე იძებნება.

როგორც სასამართლოს განცხადებაშია ნათქვამი, ბრალდებულმა თანამზრახველთან ერთად გივი თარგამაძის მკვლელობა დაგეგმა, კერძოდ კი მისი მანქანის უკანა ნაწილს ასაფეთქებელი მოწყობილობა დაამაგრა. მათივე თქმით, 2016 წლის 4 ოქტომბერს პარლამენტარი თანხმლებ პირთან ერთად მანქანაში ჩაჯდა, რის შემდეგაც ბრალდებულმა მანქანა ააფეთქა.

დაკავებულს ბრალად ედებოდა განზრახ მკვლელობის მცდელობა დამამძიმებელ გარემოებებში-ისეთი საშუალებით, რომელიც განზრახ უქმნის საფრთხეს სხვათა სიცოცხლეს და ჯანმრთელობას უკანონოდ შეიძინა და შეინახა ცეცხლსასროლი იარაღი, საბრძოლო მასალა, ფეთქებადი ნივთიერება და ასაფეთქებელი მოწყობილობა, რასაც უკანონოდ ატარებდა და რაც ასევე მართლსაწინააღმდეგოდ გაასაღა, მან აფეთქებით დააზიანა და გაანადგურა სხვისი ნივთი, რამაც მნიშვნელოვანი ზიანი და მძიმე შედეგი გამოიწვია.

ამავე საქმეზე 2017 წელს გამამტყუნებელი განაჩენია გამოტანილი ბორის ჩაგუნავას წინააღმდეგ. მას ბრალი წარდგენილი ჰქონდა სისხლის სამართლის კოდექსის 236-ე მუხლის მიხედვით, რაც გულისხმობს ცეცხლსასროლი იარაღის, საბრძოლო მასალის, ფეთქებადი ნივთიერებისა და ასაფეთქებელი მოწყობილობის მართლსაწინააღმდეგოდ შეძენა-შენახვას. სასჯელის სახედ და ზომად ოთხი წლით თავისუფლების აღკვეთა მიესაჯა, რაც ჩაეთვალა პირობით 6 წლის გამოსაცდელი ვადით.

წარდგენილ ბრალდებაში ბორის ჩაგუნავამ თავი მთლიანად სცნო დამნაშავედ და განმარტა, რომ აღნიშნული ნივთები მასთან ბინაში 2016 წლის ზაფხულში შესანახად მისმა სიძემ, დარჩო ხეჩუაშვილმა მიიტანა.

ფოტო: On.ge/თამო ლიპარტელიანი

ფოტო: On.ge/თამო ლიპარტელიანი