კომპანია სილქნეტი ჯეოსელის პაკეტების გაძვირების პროცესს დროებით აჩერებს. ჯეოსელისა და მაგთის ახალ ტარიფებთან დაკავშირებით ცნობილი რამდენიმე დღის წინ გახდა.

როგორც კომპანიის მიერ გავრცელებულ განცხადებაში ვკითხულობთ, ისინი დაელოდებიან კომუნიკაციების ეროვნული კომისიის მიერ დაანონსებულ კვლევებს და უცხოელ ექსპერტებთან ერთად დამოუკიდებელ კვლევასაც ჩაატარებენ.

"იმედი გვაქვს, რომ ეს კვლევები გონივრულ ვადებში ჩატარდება და მოგვცემს სწორი სურათის დანახვის საშუალებას. აქვე, გვინდა ჩვენთვის პრინციპულად მნიშვნელოვანი საკითხი დავაფიქსიროთ, რომ ახალ პაკეტებში მოხდა ინტერნეტის ერთეულის ფასის გაიაფება და არა გაძვირება", — ნათქვამია კომპანიის განცხადებაში.

ჯეოსელმა და მაგთიკომმა დააანონსეს, რომ 18 თებერვლიდან მათ მომხმარებელს სააბონენტო გადასახადის გადახდა მოუწევთ. ჯეოსელის აბონენტებს ექვს თვეში ერთი ლარისა და 20 თეთრის, მაგთის აბონენტებს კი ერთი ლარის. იცვლება სხვა პაკეტების ღირებულებაც.

ცვლილებებთან დაკავშირებით კომუნიკაციების ეროვნულმა კომისიამ განაცხადა, რომ აბონენტებისთვის სატელეკომუნიკაციო მომსახურებებზე ტარიფის გაზრდის არანაირი წინაპირობა და საფუძველი არ არსებობს:

"ხაზგასმით ვაცხადებთ, რომ კომისიას კანონით მინიჭებული ყველა სამართლებრივი ბერკეტი გააჩნია, კომპანიების მიერ მიღებულ არაკანონზომიერ გადაწყვეტილებებზე უმკაცრესი რეაგირება მოახდინოს".