თბილისის საკრებულოს გადაწყვეტილებით, საქართველოს მართლმადიდებელი ეკლესიის საპატრიარქოს წყნეთის გზატკეცილზე, ავტოინსპექციის საგუშაგოს მიმდებარე ტერიტორია გადაეცემა. მიწის ფართობი 3 645 მ2-ია. აღნიშნული გადაწყვეტილება საკრებულომ დღეს გამართულ სხდომაზე მიიღო.

წინადადებას 22-მა დეპუტატმა დაუჭირა მხარი. საკითხის გარშემო არც ერთი კითხვა არ დასმულა.

საკითხი განსახილველად ქონების მართვის სააგენტოს უფროსმა კარლო ლაფერაძემ საკრებულოს იურიდიულ საკითხთა კომისიაში წარადგინა, რომელმაც, თავის მხრივ, აღნიშნული საკითხი საკრებულოს სხდომის დღის წესრიგში დააყენა.

ლაფერაძის თქმით, ტერიტორია მშენებარე ეკლესიისთვისაა საჭირო:

"ეკლესიის მშენებლობა უკვე დაწყებულია და მიდის იმ ტერიტორიაზე, რომელიც წლების წინ ეკონომიკის სამინისტრომ გადასცა და ეს არის უბრალოდ დამატებითი ნაწილი, რომელსაც ერთიან სივრცეში, ერთიან გამწვანებაში ჩასვამენ".

EMC-ს და TDI-ს ინფრომაციით, 2014-15 წლებში საპატრიარქოს ბიუჯეტიდან 51 მილიონზე მეტი ლარი გადაეცა.