საქართველოს ჯანდაცვის მინისტრის დავით სერგეენკოს ცნობით, დიდ დიღომში გაზის აფეთქების შედეგად სულ 5 პირი დაშავდა. მათ შორის 3 ამ დროისთვის იაშვილის კლინიკაში იმყოფება, ერთი სამედიცინო დახმარებას გადმოჰყავს, ხოლო მეხუთე დაშავებული ღუდუშაურის კლინიკაშია გადაყვანილი.

დავით სერგეენკოს თქმით, იაშვილის კლინიკაში მყოფი დაშავებულებიდან ოთხი არასრულწლოვანია. მინისტრის თქმით, ორი არასრულწლოვნის მდგომარეობა მძიმე არ არის, ერთის მდგომარეობა კი საშუალო სიმძიმისაა. ხოლო იმ ბავშვის მდგომარეობა, რომელიც სასწრაფო დახმარების მანქანას იაშვილშ გადაყავს "საყურადღებოა".

შინაგან საქმეთა სამინისტროს ცნობით, დიდ დიღომში საცხოვრებელი კორპუსის მეექვსე სართულზე მომხდარ გაზის აფეთქებას 3 ადამიანის სიცოცხლე ემსხვერპლა.

საპატრულო პოლიცის უფროსის, თეიმურაზ კუპატაძის ცნობით, კორპუსი, სადაც აფეთქება მოხდა, მაცხოვრებლებმა უკვე დაცალეს.

აფეთქების შედეგად, ასევე დაზიანებულია კიდევ რამდენიმე სართული, მათ შორის პირველი სართული, ჩავარდნილია ლიფტი.

ადგილობრივების ცნობით, მთელი დღის განმავლობაში კორპუსში გაზის სუნი იგრძნობოდა. ადგილზე იმყოფება საგანგებო სიტუაციების მართვის სამსახური, სასწრაფო სამედიცინო დახმარება.