ვახტანგ (ვატო) წერეთელი, TV პირველის მფლობელი და იმ ორი კომპანიის მეწილე, რომელის თიბისი ბანკიდან ფულის გათეთრებაში ფიგურირებს, ამბობს, რომ ის პროკურატურას დაკითხვაზე არ დაუბარებია. ამ საკითხზე პირველ ინფორმაციას წერეთელი ფეისბუქზე წერს.

"რა მაინტერესებს იცით? იმ ორი კომპანიიდან, რომელზეც ამბავია ატეხილი, ორივეს წილს ვფლობ მე, თანაც ძალიან სოლიდურს. რას იძიებენ ესენი, ვერ გავიგე, როცა მე ამ წამამდე არავის დავუბარებივარ გამოკითხვაზე. აი, ამიტომ მეცინება ამ გამოძიებაზე თუ აქ რაღაც სხვა, მიღმა ამბავი არაა,წესით, მე ხომ უნდა დავებარებინე ვინმეს? მგონი, საბუთებში არც ჩაუხედავთ", — ამბობს წერეთელი.

9 იანვარს საქართველოს მთავარი პროკურატურის მიერ გავრცელებული ინფორმაციით, თიბისი ბანკმა იმ კომპანიებზე გასცა 17 მილიონი დოლარის სესხი, რომელმაც თიბისის დამფუძნებლებს მამუკა ხაზარაძესა და ავთო ჯაფარიძეს იგივე თანხა ასესხა. საუბარია შპს სამგორი თრეიდსა და შპს სამგორი M-ზე. წერეთელს ორივე ამ კომპანიაში წილები ეკუთვნის. გავრცელებულ განცხადებაშიც და On.ge-ს მიერ დამაზუსტებელ კითხვაზეც საგამოძიებო უწყებაში უპასუხეს, რომ საქმის შემხებლობაში მყოფი ყველა პირი დაკითხეს.

პროკურატურის ინფორმაციით, ამ საქმეზე 2018 წლის 2 აგვისტოს გამოძიება უკანონო შემოსავლების საქმეზე გამოძიება სისხლის სამართლის კოდექსის 194 მუხლის მესამე ნაწილით დაიწყო, რაც დიდი ოდენობით უკანონო შემოსავლების ლეგალიზაციას გულისხმობს. დანაშაული 9-დან 12 წლამდე პატიმრობით ისჯება.